Inatsisilerinermi pisortaq soraarpoq
Inatsisilerinermi pisortaq Namminersorlutik Oqartussani pisortani soraartuni siullersaanngilaq. Qinersinerup kingorna Naalakkersuisoqarfinni pisortat pingasut aamma soraarsimapput.
Andreas Salmony Namminersorlutik Oqartussani 2012-imi sulileraluarpoq, maannali tassa taamaatilluni.
Radioavisip Andreas Salmony pissarsiariniaraluaramiuk iluatsinngilaa. Naalakkersuisut siulittaasuata allaffeqarfiani pisortaangallartup Søren Stach Nielsenip uppernarsarusunngilaa inatsisilerinermi pisortap suliunnaarsimanera.
Radioavisilli Namminersorlutik Oqartussat oqarasuaatitigut nuutsisarfiatigut paasivaa, Andreas Salmony Namminersorlutik Oqartussani atorfeqarunnaarsimasoq, soorlu aamma oqarasuaataa atorunnaarsimasoq.
Pisortamik soraartoqaqqinneranut suut patsisaasinnaanersut Namminersorlutik Oqartussanit oqaaseqartitsisinnaasimanngilagut.
Radioavisimiit Naalakkersuisut siulittaasuat oqaaseqartinniaraluaratsigu iluatsinngilarput.
