Inatsiseqarnermut ministerip nunatsinni akuersissuteqarnermut inatsit pillugu inatsisissatut siunnersuut tusarniaassutigigaa
Akuersissuteqarnermut inatsit nunatsinni atuutingajalersinnaavoq. Danskit inatsiseqarnermut ministeriata, Mattias Tesfayep (S) nunatsinni akuersissuteqarnermut inatsit pillugu inatsisissatut siunnersuut tusarniaassutigaa.
Inatsiseqarnermut ministereqarfik tusagassiuutinut nalunaarummi allappoq.
Akuersissuteqarnermut inatsit Danmarkimi siorna atuutilersinneqarpoq. Inatsit taanna inummik akuersissuteqanngitsumik atoqateqarneq pineqaatissiissutaasinnaaneranut tunngavoq. Illuatungeriit atoqatigiinnissamut tamarmik piumanerlutik qulakkiissavaat. Akuersissuteqartoqarnissaalu qulakkeersimanngikkaanni tamanna atornerluinerussaaq.
Nunatsinni pinerluttuliornermut inatsit ullumikkutut itsillugu inummut nakuuserluni imaluunniit nakuusernissamik siorasaaruteqarluni atoqateqartoqaraangat imaluunniit allatut pinngitsaanertaqartumik atoqateqartoqaraangat atornerluisutut ilaatigut pineqaatissiisoqartartoq, inatsiseqarnermut ministereqarfik allappoq.
Inuk pissutsini imaluunnit pisumi iliuuseqartoqarneranut akerliliisinnaanngitsoq atoqatigineqarpat tamanna atornerluinertut aamma pineqaatissiissutaasarpoq.
Inatsisissatut siunnersuutip Inatsisartuni ukioq manna ukiakkut ataatsimiinnermi aamma oqallisigineqarnissaa Inatsiseqarnermut ministereqarfiup naatsorsuutigaa. Tamatuma kingorna inatsisissatut siunnersuut folketingimi suliarineqassaaq, siunnersuullu politikkikkut akuersissutigineqassappat akuersissuteqarnermut inatsit nunatsinni aappaagu atuutilersinnaavoq.
Danmarkimi atornerluisoqarneranik unnerluutiginninnerit pasisaqarnerillu amerlisut
Inatsit Danmarkimi atuutilersinneqarmat atornerluinerit unnerluutigineqartut amerlasoorujussuupput. DR.dk taama allaaserisaqarpoq.
Danmarkimi unnerluutiginninnerit 2021-mi 2.126-upput. Taakku 2020-mut sanilliullugit 50 procentimik amerlanerupput.
Inatsiseqarnermut ministereqarfiup akuersissuteqarnermut inatsisip pitsaasumik sunniuteqarnissaa neriuutigaa:
- Akuersissuteqarnermut inatsisip Kalaallit Nunaannut atuutileriartornera nuannaarutigaara. Inuup kialuunniit timini nammineq aalajangiiffiginnaatitaavaa, taamaammallu kinguaassiutitigut pisut nammineq piumassutsimik tunngaveqartariaqarput, ministeri tusagassiuutinut nalunaarummi allappoq.
Naaja Nathanielsenip (IA) inatsiseqarnermut naalakkersuisuunermini akuersissuteqarnermut inatsisip nunatsinni atuutilersinneqarnissaanut isummani oqaatigereerpaa. Taassuma atornerluinermut sulianut tunngatillugu inatsisit nutarterneqarlutillu nutaaliaanerunissaat pisariaqartinneqartoq siorna aggustimi oqaatigaa.
Naalakkersuisunili qaammatip siuliani nikitertoqarpoq. Aqqaluaq B. Egede inatsiseqarnermut naalakkersuisunngorpoq, taassumalu Danmarkimi suleqatimi akuersissuteqarnermut inatsit pillugu inatsisissatut siunnersuummik tusarniaassuteqarnera nuannaarutigaa.
- Suliniut tamarmik kinguaassiutitigut kannguttaatsuliortoqannginnissaanut qulakkeerissutaasut naammassineqassapput. Kinguaassiutitigut kannguttaatsuliortoqarnerani pinerliffigineqartut inatsisitigut pitsaanerpaamik illersorneqarnissaasa qulakkeernissaat pingaaruteqarpoq. Taamaammat akuersissuteqarnermut inatsit Danmarkimisulli inuiaqatigiit atornerluinermik paasinnittarnerannut allannguinissaa neriuutigaara, Aqqaluaq B. Egede tusagassiuutinut nalunaarummi oqarpoq.
