Inatsisartut ukiaanerani ataatsimiinnerminni angorusutaat
Inatsisartunut ilaasortat ukiaanerani ataatsimiinnerat ullumi tallimanngornermi aallartippoq.
Partiit ataasiakkaarlugit ukiakkut ataatsimiinnissamut suut qilanaarisimaneraat paasiniarlugu KNR-imiit apersorpagut.
Demokraatit siulittaasuat, Jens-Frederik Nielsen, inatsisartuni ukiaanerani ataatsimiinnissassinnut suna qilanaarinerpaavisiuk?
- Siunnersuutitta 21-t saqqummiunnissaat, kisianni aamma aningaasanut inatsit qilanaarivarput.
Uani ukiaanerani ataatsimiinnermi suut partiitut angorusuppisigit?
- Inuiaqatigiinnut oqilisaanerit, inuiaqatigiit akunnattumik annikinnerusunillu isertitallit inuuniarnerannut oqilisaanissaq angorusuppagut.
- Taakku saniatigut inuussutissarsiutitigut inerisaaneq nunatut ineriartortitsineq, aningaasarsiorluarnerunissarput qulakkeerusuppagut.
AAMMA ATUARUK Aningaasat naleerukkiartorneranni Inatsisartut ataatsimiilerput
Naleqqami siulittaasoq, Pele Broberg, inatsisartuni ukiaanerani ataatsimiinnissassinnut suna qilanaarinerpaavisiuk?
- Oqallinnerup aallarteqqinnissaa qilanaarivarput.
Suummi angorusuppisigit?
- Nunap inuisa ulluinnarsiutaanni tigussaasumik allannguiartorneq aallartissallugu. Massakkumut angunikuusat ilaleqqillugit, taakku naammaginanngimmata uniffigiinnarlugillu inissisimasinnaannginnatta.
Atassut siulittaasuat, Aqqalu Jerimiassen, inatsisartuni ukiaanerani ataatsimiinnissassinnut suna qilanaarinerpaavisiuk?
- Siunnersuutigut saqqummiunnissai qilanaaraagut. Soorlu ikuallaaveqarnikkut/eqqaaveqarnikkut aaqqissuusseqqinnissamik arlaannik avannaanut tunngasunik unammillernartumik inissisimasumik aaqqissuusseqqittoqarnissaa.
Suut angorusuppisigit?
- Nerisassanik sapigalinnut ulluinnarni unamminarnerusumik aaqqissuusseqqinnissaq. Akit unamminarnerusumik inissisimalersinnaanissaat eqqarsaatigalugit.
Siumut sinnerlugu oqaaseqartoq, Doris J. Jensen, inatsisartuni ukiaanerani ataatsimiinnissassinnut suna qilanaarinerpaavisiuk?
- Oqartussaaffiit Danmarkiminngaaniit nunatsinnut angerlaanneqarnissaat. Innuttaasut atugaasa pitsaanerulernissaannik anguniagaqarpugut. Kisianni aamma eqqaamaneqartariaqarpoq nunarsuarmi sorsunnerup kingunerisaanik allallu nappaatit atuuttut tunngavigalugit aningaasarsiornikkut unammillerneqaratta.
- Taamaattumik aningaasarsiornitta patajaatsumik ingerlaqqinnissaanik suleqataanissarput Siumuminngaaniit pingaartipparput.
Siumumiit suna angorusuppisiuk?
- Innarluutilinnut tunngasunik siunnersuuteqarpugut, suliffeqarfiutitta ammasumik periuseqarnissaanik qulakkeerinnittussanik assigiinngitsunik siunnersuuteqarpugut.
Inuit Ataqatigiit sinnerlugit oqaaseqartoq, Agathe Fontain, inatsisartuni ukiaanerani ataatsimiinnissassinnut suna qilanaarinerpaavisiuk?
- Oqaluuserisassanngortitassat saqqummiunnissaat qilanaarivagut, soorlu nunalerinermi ilinniarfimmi nalunaarusiortoqarnissaanut, imminut pilersorsinnaaneq pingaartitarigatsigu tassuunakkut aamma akinut tunngasunik iluaqutaasinnaaneranik takorluugaqaratta.
AAMMA ATUARUK Aslak Jensen Inatsisartunit tunuartoq
Suut angorusuppisigit?
- Aningaasanut inatsit isumaqatigiilluta angusinnaassagipput neriuutigivarput, tassami inuiaqatigiinnut pingaarnerpaaq inatsit, partiit tamarmiullutik peqataaffigisinnaagaluarpassuk qujanassagaluaqaaq.
Inatsisartunut ilaasortat ullumi tallimanngormerni septembarip 23-aniit novembarip 24-ata tungaanut ataatsimiissapput.
Ammaanersiornermi Muté B. Egedep oqalugiaataa uani atuarsinnaavat.
