Aslak Jensen Siumumeersoq Inatsisartunit tunuarniarpoq.Assi: Malik Brøns / KNR

Aslak Jensen Inatsisartunit tunuartoq

Siumumeersoq Aslak Jensen Inatsisartunit tunuarpoq. Tamanna Ukiakkut ataatsimiinnermi nalunaarutigineqaqqammerpoq.

Siumumit Aslak Jensen Inatsisartunit tunuarniarpoq.

Tamanna Ukiakkut ataatsimiinnermi nalunaarutigineqaqqammerpoq. Inatsisartunit ilaasortanit tassunga oqaaseqartoqanngilaq.

Aslak Jensenip inuttut atukkani ullormiit ullormut tunuarniarnerminut pissutaasunut tunngavilersuutigai.

- Inuttut aqqusaarsimasakka pissutigalugit taamak aalajangersimavunga. Aalajangerneq taanna uannut soorunami imaannaanngilaq. Tamanna isumaqanngilaq politiki qimakkiga, kisianni tassa qinikkatut sulinera unitsikkallassallugu aalajangersimavunga, tamannalu ataqqillugu paasineqassasoq kissaatigaara, Aslak Jensen oqarpoq.

Aslak Jensenip tunuarnissamik aalajangernera Siumumi siulittaasup ugguutigalugu tusagassiuutinut nalunaarummi oqaatigaa.

- Inuk politikimik suliaqarnissamut piukkunnarluartoq qinikkatut sulinerminit tunuarternera uggornarpoq. Siumumili Aslak W. Jensenip kissaateqarnera ataqqillugu tunuarniuteqarnera tusaatissatut tiguarput, annerusumillu oqaaseqarfigissanatigu, Erik Jensen oqarpoq.

Erik Jensen Siumumit atuuffik inuttaqarunnaarnera pissutigalugu Inatsisartuni atuutileqqinniarluni nammineq aalajangerpaa. Taanna Inatsisartut siulittaasuannut qinnuteqarpoq. Erik Jensenilu naalakkersuisut siulittaasuannut tulliuvoq.

Eqqartuussiveqarfimmit eqqartuussaanikuusoq

Aslak Jensen oqartussani sulisunut toqumik siorasaarisimasutut eqqartuussiveqarfimmit pinerloqqissaguni ulluni 20-ni pineqaatissinneqarsimasunut inissiisarfimmiittusanngortinneqarnikuuvoq. Suliaq Nunatta eqqartuussisuuneqarfianut suliareqqitassanngortinneqarnikuuvoq, taannalu septembarimi suliarineqartussaagaluarluni novembarip ulluisa aappaannut kinguartinneqarnikuuvoq.

Pisortat oqartussaatitaannik narrunarsaaneq

Aslak Jensen pinerluttulerinermi inatsimmi paragraf 37 naapertorlugu unnerluutigineqarpoq: 

"Pisortat oqartussaatitaannik narrunarsaasutut eqqartuunneqassaaq kinaluunniit nakuuserluni imaluunniit nakuusernissamik sioorasaaraluni imaluunniit asissuilluni, oqaasipilulluni imaluunniit allatut ajuallaataasumik oqalulluni saassussisoq inummik, pisortani kiffartuumminik imaluunniit suliassaminik imaluunniit tamakkununnga atatitamik suliaqartilluni iliuuseqarnissaminut pisussaaffeqartumik".

Aslak Jensen suli pinngitsuunerartoq, taassuma eqqartuussissuserisuatalu Finn Meinelip pinngitsuutitsisoqarnissaa anguniarpaat.

Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani sianerluni isumaginninnermik suliaqartumut toqutsinissamik siorasaaruteqarsimasutut unnerluutigineqarpoq. Pinerluttuliornermut inatsimmi pisortani suliffeqartumut tunngasumik paragraf 37-mik unioqqutitsisimasutut unnerluutigineqarpoq.

Eqqartuussivimmi suliaq kommunip Aslak Jensenip ilaqutaanut tunngatillugu aalajangiuteqarsimaneranik tunngassuteqarpoq.

Siorasaarisimanerminik eqqaamasaqanngitsoq

Unnerluussut naapertorlugu Aslak Jensen Kommuneqarfik Sermersuumi isumaginninnermik suliaqartumut oqarasuaatikkut ima oqarpoq: - Ilissi politeersuillu toqorassuassi.

- Kinaanerit ujartussuakkit. Utaqqilaarit toqussuakkit.

Taassuma suliaq Eqqartuussisoqarfik Sermersuumi suliarineqarmat tamanna ilisarinnginnerarpaa. Taassumalu kommunip inunnik isumaginnittoqarfianut sianersimanini eqqaamanerarpaa, siorasaaruteqarsimasorinanilu.

- Toqussavakkimmik oqarninnik eqqaamasaqanngilanga. Suliaq tamaat misissuiffiginiarlugu oqaatigaara, taanna eqqartuussivimmi oqarpoq.

Aslak Jensen Inatsisartunut siorna apriilimi qinersinermi 814-init taaguunneqarluni Siumumit taaguunneqarnerpaat pingajoraat.

Taanna Inatsisartuni aalisarnermut, piniarnermut nunalerinermullu ataatsimiititaliaanni siulittaasumut tullersortaanikuuvoq. Atuuffilli taanna Naleqqap apriilimi naalakkersuisoqataajunnaarnerani ataatsimiititalianilu ilaasortat allanngorneranni atuuffigiunnaarpaa.

Taanna ullumimut nunanut allanut sillimaniarnermut ataatsimiiititaliami, aalisarnermut piniarnermut avatangiisinullu ataatsimiititaliami aamma Kukkunersiuisut ataatsimiititaliaanni kiisalu nunat avannarliit killiit siunnerusisoqatigiivini ilaasortaagaluarpoq.

Aslak Jensenip eqqartuussinerup kingorna Inatsisartunit sulinngiffeqarnissani noqqaassutiginikuugaluarpaa, itigartinneqarnikuullunili.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl