Ilinniartut siunnersuisoqatigiivisa Pitap ilinniartut ineqarfiinut inatsisip ajornartorsiutaanera ukkatarineqalersippaa. Poltiikerit maanna ilaatigut Soriina Davidsen (assimiittoq) Pitamiit inatsisip allanngortinneqarnissaanut kissaateqartoq tusarnaarpaat.Assi: Studenterrådet Pitaq

Inatsisartut ilinniartut ineqarfiinut inatsimmik allannguisut: Ilinniartut meerartaarnerminni ineqarfimminniiginnarsinnaalersut

Ilinniartut ineqarfiinut inatsisip allanngortinneqarnissaa Inatsisartut sisamanngornermi isumaqatigiissutigaat, ilinniartut meerartaareernermi kingorna taamaalillutik inigisaminniiginnarsinnaalerput. Allannguut juulip ulluisa aallaqqaataanit atuutilissaaq.

Tamanna utaqqisaasimavoq, maannali allaganngortinneqarpoq.

Ilinniartummi ineqarfii pillugit inatsisip allanngortinneqarnissaa Inatsisartuni isumaqatigiiffiusumik ullumi atulersinneqarpoq. Tamanna siunnersuutip Upernaakkut ataatsimiinnermi pingajussaaneerneqarnerani akuerineqarpoq.

Allannguisoqarnerata kingunerisaanik ilinniarnivit nalaani angajoqqaanngoruit inigisannik annaasaqarnissat ernumassutigisariaaruppat.

Inatsisimimi pisoqqami ilinniartut ineqarfitsit annaaratarsinnaasarpaat. Siunnersuut ilinniartut ineqarfiinut inatsimmi paragraf 38-mut tunngassuteqarpoq.

Inatsit taanna malillugu ilinniartup ilinniartutut ineqarfeqarnissaminut pisinnaatitaaffini ernereernermi kingorna annaasinnaagaa allassimavoq.

Ilinniartut siunnersuisoqatigiivisa oqaluuserisassanngortitarigaat

Ilisimatusarfimmi Ilinniartut siunnersuisoqatigiivi Pitaq juulimi isornartorsiuteqarput:

Siunnersuisoqatigiit tassunga atatillugu politikerit inatsimmik allannguinissaat piumasaraat.

Pitamit Soriina Davisen KNR-imut juulimi ima oqarpoq:

- Ilinniartut ernigunik najugarisartik inatsisit malillugit qimattariaqartarnerat, ilinniarnerminnillu unitsitsisariaqartarnerat ilinniartut siunnersuisoqatigiivininngaanniit Pitarmiit ajornartorsiutitut isigaarput, Soriina Davidsen oqarpoq. 

Tamannalu Inatsisartuni politikerit isumaqatigaat. Naalakkersuisut Upernaakkut ataatsimiinnissamut siunnersuuteqarput, taannalu marsip ulluisa 24-anni siullermeerneqarluni.

AAMMA ATUARUK Inatsisartut isumaqatigiittut: Ilinniartut meerartaarnermi kingornatigut ilinniartut ineqarfianniiginnarsinnaassapput

Partiit tamarmik ilinniartut meerartaarnermi kingorna ineqarfimminniiginnarsinnaanissaat taperseraat tassani ersarissereerpoq.

Tapersiineq taanna partiit tamarmik siunnersuummut ullumikkut akuersinerannik kinguneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl