Inatsisartut ataatsimiinerat toqqaannartumik TV-ikkut aallakaatinneqartalissaaq
Nassitsissutit digitaliusut decemeber-imi siorna atulersut, atorlugit nuna tamakkerlugu isiginnaarneqarsinnaasut amerlineqarput, taakkua tallimaasut ilaat ataaseq atorlugu inatsisartut ataatsimiinnerat toqqaannartumik malinnaaffigineqarsinnaalissapput.
KNR TVip aallakaatitai allat sisamat, DR-Ramsjang DR-HD DR-K aamma KNR-TV inatsisartut toqqaannartumik ataatsimiinneranni allannguuteqaratik aallakaatinneqassapput.
Inatsisartut ataatsimiinnerat Kalaallit Nunaanni illoqarfinni nunaqarfinnilu tamarmi malinnaavigineqarsinnaassanngillat, tassami nunarput tamakkerlugu manna tikillugu nassitsissutit digital-iusut atorneqarsinnaanngimmata.
Periarfissat nutaat atorlugit inatsisartut ataatsimiinnerisa toqqaannartumik aallakaatinneqartalernissaat KNRimit kissaatigineqarsimavoq, tamannalu inatisartut siulittaasoqarfianit nuannaarutigineqarpoq.
Siulittaasoqarfiup nuannaarutigaa ukiorpassuarni kissaatigineqartarsimasoq maanna naammassineqarsinnaalermat. Nutaamik aallakaatitsisalernikkut ataatsimiinneq tamarmi isiginnaarutikkut malinnaavigineqarsinnaassaaq inatsisartut siulittaasuat Josef Motzfeldt oqarpoq.
Toqqaannartumik aallakaatitsisarneq aallaqqaammut misiligutitut ingerlanneqassaaq, aallakaatitsisarnerillu upernaakkut ataatsimiinneq naammassereerpat nalilersorneqassapput.
KNR radiup, ataatsimiinneq radiukkut nalunaaqutaq ataatsiniit ualikkut tallimat tungaanut aallakaatittassavaa. Aallakaatitsinerit pingasunngornikkut aqqanernut aallartittassapput, akunneq apeqquteqarfiusinnaasoq aallarniutaasassalluni.
Tamatuma saniatigut ataatsimiinneq inatsisartut nittartagaatigut inatsisartut.gl-ikkut toqqaannartumik malinnaavigineqarsinnaassaaq.
