Inatsisartut aningaasanut inatsisissaq isumaqatigiissutigingajalerpaat
Aningaasanut inatsisissatut siunnersuut Inatsisartunit pingajussaaneerneqaqqaarluni inatsisitut aatsaat naammassisussaavoq.
Tamanna Atassummi aningaasat pillugit oqaaseqartartup, Steen Lyngep erseqqissarpaa.
Taamaakkaluartoq aningaasanut inatsisissatut siunnersuutip politikkikkut suliarineqarnera ulluni tulliuttuni naammassineqarnissaa taassuma ilimagaa.
- Isumaqatigiissutit annertuut maanna inissitsitiortoreernikuupput. Taamaattumik tamakkiisumik isumaqatigiissutigineqapajaarnera inissipajaarpoq, Steen Lynge oqarpoq.
Aamma atuaruk Aningaasanut inatsisissatut siunnersuummi oqallinneq kisitsiseqarpallaanngitsoq
Aamma Inuit Ataqatigiit aningaasat pillugit oqaaseqartartuata, Naaja Nathanielsenip, aningaasanut inatsisissatut siunnersuut pillugu isumaqatigiinninniarnerit piffissami qanitsumi naammassissasut ilimagaa.
- Siunnersuutigut, piumasagut kissaatigisagullu saqqummiussagut akuersorneqarluartut isumaqarpunga. Tamannalu nalunaaquttap akunnerisa tulluittuni ullullu tulliuttuni isumaqatigiinninniarnernut tikkuussilluartoq Inui Ataqatigiinnit isumaqarpugut, Naaja Nathanielsen oqarpoq.
Aningaasanut inatsisissatut siunnersuut ulluni tullerni naammassineqassasoq Siumumit aamma isumaqartoqarpoq. Naak siunnersuutit ilai isumaqatiginngikkaluarlugit partiinut allanut naapeqatigiinniartoqarsimasoq, Siumumi aningaasat pillugit oqaaseqartartoq Jens Immanuelsen oqarpoq.
- Tunngavissaalluarpoq, aamma taanna siullermeernerani oqaatigaarput, aningaasanut inatsisissaq imaanngilaq isumaqatigigipput, Jens Immanuelsen oqarpoq.
Aamma atuaruk Vittus: Sapinngilara
Demokraatinit aningaasanut inatsisissatut siunnersuut aamma iluarisimaarutigineqarpoq.
- Akileraarutit qaffanneqannginneri iluarisimaarutigeqaarput. Innuttaasut taamaasillutik aningaasaateqarnerussapput, Demokraatit aningaasanut oqaaseqartartuat, Tillie Martinussen oqarpoq, ilanngullugulu oqarluni Inatsisartuni aningaasaqarnermut akileraartarnermullu ataatsimiititaliaanni suleqatigiinneq ingerlalluarsimasoq.
Aamma atuaruk Anda: Tamaasa naalaarpagut
Partii Naleraq aningaasanut inatsisissatut siunnersuummut isumaqatiginninniarnerni aningaasaqarnermut naalakkersuisumit Vittus Qujaukitsumit qaaqquneqarnermi kingorna ilaaqqilersimasut, Partii Naleqqami aningaasat pillugit oqaaseqartartoq Anthon Frederiksen oqarpoq.
Partii Nalerarlu naapertorlugu suli aaqqitassaqarpoq.
- Soorunami arlalinnik ajunngitsunik imaqarpoq, kisianni aamma arlaqarput uparuartariaqartut aamma iluarsisariaqartut, uagut Partii Naleqqamiit isumarput naapertorlugu, Anthon Frederiksen oqarpoq, ilaatigut aaqqissuusseqqinnerit kingunerisinnaasai ernumassutigalugit, akitsuutillu akuerisinnaanagit oqarluni.
