Inatsisartunut qinersinermi allakkatigut qinersiaarit
Kommunip allaffiani allakkatigut qinersisoqarsiinnavoq, qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut taasisinnaapput.
Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini taasisinnaapput, soorlu napparsimmavinni uninngasut taakkunani aamma allakkatigut taasisinnaasut.
AAMMA ATUARUK Inatsisartunut qinersinissamut allakkatigut qinersisoqarsinnaalereerpoq
Namminersorlutik Oqartussat siusinaarluni qinersisoqarnissaa kaammattuutigaat, qinersisartormi kommunimi addresseqarfigisamini qinersiartorsinnaanani nalunaarutigisussaavaa, taamaalilluni taasineq aatsaat atuutsinneqarsinnaalluni. Taasinerlu apriilip 24-ani naluanaqutaq unnukkut arfineq-pingasunngortinnagu apuutereersimasussaavoq.
Danmarkimi allakkerivik Post Nord naapertorlugu Danmarkimit nunatsinnut allakkamik nassiussineq ulluni marlunnit arfinilinnut sivisussuseqartarpoq.
