Apriilip 24-ani qinersinissaq Inatsisartunut qinersinissamut allakkatigut qinersisoqarsinnaalereerpoq
Kommunimi inuit nalunaarsorsimaffianni, Folkeregisterimi, allakkatigut qinersisoqarsinnaassaaq. Inuit nalunaarsorsimaffiitut aamma paasineqassapput kommunimi najugaqarfiup pingaarnerup avataani kommunip allaffii.
Napparsimmavinni imaluunniit peqqissartarfinni paaqqutarineqartarfinniluunniit allani uninngasut, pinerluuteqarsimasunillu isumaginnittoqarfiup inissiisarfiani inissinneqarsimasut allakkatigut aamma taasisinnaapput.Qinersisartut umiarsuarni
Kalaallit Nunaanni angerlarsimaffeqartuniittut umiarsuup naalagaanit taassumaluunniit toqqagaanit taasisinneqarsinnaapput.
Silasiorfinni timmisartunullu mittarfinni assigisaannilu inummi Qinersinermut ataatsimiititaliamit piginnaatinneqartumi allakkatigut taasisoqarsinnaavoq.
Qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut taasisinnaapput.
Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini taasisinnaapput.
Allakkatigut taasissut kommunimi qinersisartup qinersisussat allassimaffimmiiffigisaanut nassiunneqassaaq. Allakkatigut taasissut taasiartorfimmut qinersisartup qinersisussat allassimaffimmi nalunaarsorsimaffigisaanut ullormi qinersiffiusup ingerlanneqarnera naatinnagu tiguneqareersimassaaq, tassa imaappoq marlunngorneq apriilip ulluisa 24-anni 2018 unnukkut nalunaaqutaq arfineq-pingasut nallertinnagit. Taamaattumik siunnersuutigineqarpoq allakkatigut taasinissaq piffissaalluartillugu ingerlanneqassasoq.