VIDEO Inatsisartunut qineqqusaartut innuttaasunit tusanngunartinneqalereersut
- Maluginiarnerpaasara tassaavoq innuttaasunik imatorujussuaq tusaaniarnatik partiit imminnut saassuttaqattaarnerat. Tusaarusunneruakka innuttaasut pillugit oqallittoqarnissaa, partiit imminnut kusanaatsumik pisarneri killeqartariaqarami, Juliane D. Berthelsen KNR-imut taama oqarpoq.
- Isumaqarpunga inuttarsiuineq pinnani partiit anguniagaat suulluunniit inuiaqatigiinnut ajunngunnerusumik ingerlanissamut tunngasut taakkua pingaarnerpaajusut nipiliuutigineqartariaqartullu. Inuttarsiuinerit pivallaarnagit, aamma kinguarsaataasaramik tamakkua sumiluunniit oqallinnermi, Enok Josiassen taama isumaqarpoq.
Aamma atuaruk GA: Qineqqusaarneq politikkikkut inerisimannginnermik takutitsivoq
- Tassani nilliaannalertorsuummata, eqqarsarpunga: "Arraa iluamik", Evi Kreutzmann oqarpoq Rebekka Jeremiassenillu isumaqatigaa:
- Assortuuttorujussuupput kamaateqqajaallutillu. Pikkunalaarpoq taamannak qineqqusaarsinnaammata, Rebekka Jeremiassen taama isumaqarpoq.
Tunngavissaqarluartumik oqallittoqarnissaanik ujartuisoq
Ilulissani Sisimiuni qineqqusaartitsinerit radiokkut tv-kkullu aallakaatinneqarput. Taakkunanili arlallit ingasattajaarlutik nippattartut, Jakob Mølgaard isumaqarpoq.
- Qineqqusaartut ilaat eqqissisimasorujussuupput, kisianni aamma ilaat ingasattajaarlutik nippattarlutik. Pineqartunili ilaiat ningorterisutut akisarput ilaallu akilluartarlutik. Kisianni malunnarami tunngavilersorluagaanngitsunik akissuteqartartut, taanna maqaasinarsinnaavoq.
Aamma atuaruk Sisimiuni qineqqusaarneq takoqqiguk
- Imaanngilaq nipitunerit qinerniarigut, tunngavilersorluartumilli toqqammaveqarluarlutik politikkkiminnik saqqummiussisut taakkua immaqa qineruminarnerussapput, Jakob Mølgaard isumaqarpoq.
Qineqqusaarnerit tullissaat ataasinngorpat novembarip pingajuani radiokkut tv-kkullu toqqaannartumik aallakaatinneqassaaq, tamatumuuna Qaqortumi pissalluni. Ullullu marluk qaangiunnerini Narsaq tikinneqassaaq. Qinersinerullu ullua ullunik tallimanik sioqqullugu Nuummi aatsaat qineqqusaartoqartussaavoq.
KNR-ip qinersinermut atatillugu radiokkut tv-kkullu aallakaatitsinissamut pilersaarutai uani atuarneqarsinnaapput.
Aamma atuaruk Ilulissani qineqqusaarneq takoqqiguk
