Inatsisartunut ilaasortap qaleralittassanik pisiortukkat utertikkusuppai

Karl Kristian Kruse Siumumeersoq parteeqatiminut, aalisarnermut naalakkersuisumut Karl Lyberthimut § 37 naapertorlugu apeqquteqaateqarsimavoq. Suliffeqarfiit anginerit qaleralinnianit 6 meterimit anginerusunik angallatilinnit pisassanik pisiortorsimanerat pillugu Naalakkersuisut isumaat paaserusuppaa.
Allattoq Peter Troelsen, Simon Uldum
juulip 19-at 2013 07:29

Krusep ineriartorneq maanna pisimasoq naammaginngilaa, aalisartummi ataasiakkaat piginneqatigiiffinnut anginerusunik angallatilinnut pisassiissutiminnik tunisaqarnerinik kinguneqarsimammat. Karl Kristian Kruse isumaqarpoq tamanna ineriartorneq unitsinneqartariaqartoq inuit ataasiakkaat qaleralinniarnermik inuussutissarsiuteqartut periarfissaasa ajorsiartunnginnissaat siunertaralugu. Taamaammat qaleralittassiissutit taakku utertinneqarsinnaanerinut periarfissaqarnersoq paaserusuppaa.

- Qaleralittassat suliffeqarfissuit pisiaat utertinneqarsinnaaneri atorunnaarsinneqarsinnaaneriluunniit inuiaqatigiinnut aningaasartuutaaratarsinnaavoq, isumaqarpungali siunissaq eqqarsaatigalugu tamanna akilersinnaasoq, nunatsinni inuit ataasiakkaat qaleralinniarnermik inuussutissarsiuteqartut illersorsinnaasumik amerlassuseqartariaqaramik, Karl Kristian Kruse Lyberthimut apeqquteqaatini taama tunngavilersuuteqarfigaa.

Karl Kristian Kruse aamma isumaqarpoq minnerpaaffiliinikkut qaleralinniat 6 meterinit anginerusunik angallatillit amigartoorutaanngitsumik inuussutissarsiorsinnaanissaat anguneqarsinnaasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq