Inatsisartunngorlaat qilanaartut: Attortinnarpoq, piareeqqavugullu.
- Assut eqqumiippoq, tuppallernarpoq nuannerlunilu. Misigisaq maannamut suli allaavoq, pissanganaqaaq nuannerlunilu,
Siumut sinnerlugu inatsisartunut ilaasunngortoq, Lars Poulsen (S) oqarpoq.
Inatsisartut Naalakkersuisullu nutaat
Inuit Ataqatigiit apriilip ulluisa arfernanni qinersisoqarnerani inissani 31-usuni aqqaneq marlunnik ilaasortaatitaqalerput.
Naalakkersuisoqataallu Naleraq sisamanik ilaasortaatitaqalerluni.
Taamaalillutik taakku partiit marluk katillugit 16-inik amerlanerussuteqalerlutik.
Atassut maanna tapertatut inissippoq, marlunik ilaasortaatitaqarluni.
Illuatungiliuttuni Siumut qulinit ilaasortaatitaqarpoq, Demokraatillu pingasunik ilaasortaatitaqarlutik.
Suleqatigiissitsisut Nunattalu qitornai qinigaatitaqanngillat.
Taannalu sulilernissaminut qilanaarpoq.
- Sulilernissaq qilanaarnarnerpaavoq. Naalakkersuisoqatigiilertussat inatsisartunullu qinigaasut suleqatigiinnissaat qilanaarnarnerpaapput. Taakkulu qinigaarlaatut naapinnissaai suleqatigilernissaallu uannut qilanaarnarput.
Inuit Ataqatigiit sinnerlugu inatsisartunut ilaasortanngorlaaq, Pipaluk Lynge Rasmussen (IA) qilanaartunut ilaavoq.
- Akisussaaffik annertungaarmat maninguunnartorujussuuvoq. Inuttaaasunik kiffartuussinissaq qilanaarnarlunilu pissanganartorujussuuvoq. Qilanaaqaanga qujamasullungalu maninguuppunga.
Innuttaasunillu sullissinissaminut aamma qilanaaqaaq.
- Tassa kiffartuussinissara inatsisartunullu siunnersuutigerusutakka avatangiiseq pillugu taavalu innuttaasut akornanni naligiinnginnerujussuatta naligiinnerulernissatsinnut illorraap tungaanut ingerlalernissatsinnut siunnersuuteqartalernissara suliaqartalernissaralu assut qilanaaraakka, Pipaluk Lynge Rasmussen (IA) oqarpoq.
Ammaanersiornissamut piareeqqasoq
Inatsisartullu aqangu ammaanersiulerpata Emanuel Nûko (N) aamma ammaanersioqataanissaminut piareeqqavoq.
- Tasiilamiikkamali tamakku piareersareernikuuakka. Annoraaqassaanga taavalu tunumiut kamiinik atortussaallunga, tamanut piareersimavunga.
Inatsisartunut ilaasortanngornini ulluinnarminut allanngortitsilluinnassanerarpaa.
- Piniarnermik inuussutissarsiuteqartuuvunga ukiukkullu piniariarlunga angalaannaavittarpunga. Ukiukkulli inatsisartut ataatsimiittalertarmata taanna allannguutiginerpaassavaa, nuummiittartussaavungami, Emanuel Nûko (N) oqarpoq.
