Inatsisartuni uranimut naaggaartut amerlanerugallarput
Inatsisartut aalajangernissaannut Naalakkersuisut siunnersuutaat maanna qaammataannanngornerani qanoq inerneqassanersoq suli nalunarpoq.
Randi Broberg immikkut maluginiagassaavoq, massakkut nalunaarutigaa uranimut naaggaarluinnarnerup atuutsiinnarnissaanut taasiumaarluni.
Inatsisartuni ilaasortat aqqanillit angernissaat qularnanngilaq. Aammali qularnanngilaq 13-it naaggaarniartut. Tassalu inatsiartunut ilasortat arfineq marluk qanoq isummerumaarnersut maannamut suli apeqqutaavoq.
Uranimut naaggaarluinnarnerup taamaatinneqarnissaanik, Naalakkersuisut siunersuutaannut inatsisartunut ilaasortat tallimat suli isumminngillat.
Inatsisartunut ilaasortanut Radioaviisimiit sianeqattaarnermi tamanna paasinarsivoq. Inatsisartunut ilaasortat marluk paasiniaanitsinni attaveqarfiginiaraluaratsigu iluatsinngilarput.
Inatsisartuni ilaasortat 13-it aalajangersimaqalutik uranimut naaggaarluinnarnerup atuutsiinnarnissaa aalajangiusimavaat. Taama taasiniartut tassaapput Inuit Ataqatigiinneersuut Demokraatineersullu ataatsip, saniartigut Partiit Inuit inatsitsartuni ilaasortaatitaat ataasiusoq, Randi Broberg.
Randi Broberg immikkut maluginiagassaavoq. Tassami Nalakkersuisunngortitsinermi isumaqatigiissummi allassimavoq aatsitassanik qinngornertalinnik naaggaarluinnarneq atorunnaarsinneqasasoq. Randi Broberg taamakkaluartoq aaliangersimavoq, uranimut naaggaarluinnarnerup atorunnaarsineqarnissaa taasissutigineqalerpat naaggaarniarluni.
Inatsisartunut ilaasortat angissamartut Siumumeersuullutillu Atassummeersuusut aqqaniliupput.
Kisianni uranimut naaggaarluinnarnerup atorunnaarsinneqarnissaa inuiaqatigiit peqqissusaanut ajoqutaasappat, Demokratinit Jens B. Frederiksen aamma Atassummit Gerhardt Petersen naaggaarlutik taasinissamut piareersimapput. Taakkua saniatigut Siumumeesut, Anders Olsen, Hans Enoksen Kim Kielsenilu qanoq taasiumaarnerminnik oqaaseqarumanngillat.
Tassa massakkuugallartumik uranimut naaggaartut inatsisartuni amerlanerupput.
Uraanimut nunatta naaggarluinnarnera atorunnaarsinneqassanersoq, Inatsisartut oktobarip 24-ani taasissutigissavaat.
Radioaviisimit Inatsisartuni ilaasortat marluk Jens Imanuelsen aamma Karl-Kristian Kruse pissarsiarisinnaasimanngilagut.
