Inatsisartuni ullormut pisussat
Siumumeersup Suka K. Frederiksenip siunnersuutaa siulliullugu aappassaaneerneqassaaq. Taassuma siunnersuuteqarnermini Naalakkersuisut periarfissikkusuppai aalisakkanik tunisassiorfinnut innaallagissamut imermullu akigitinneqartunik nunap qaavani toqoraavinnut Neqi A/S-itut ittunut neqerooruteqarsinnaalersillugit.
Tamanna pereerpat Inuit Ataqatigiinneersup Aqqaluaq B. Egedep siunnersuutaa oqaluuserineqassaaq. Taassuma savaateqarfinnik tunisinerni tunniussinerniluunniit savaatillit akiitsuinik tamakkiisumik ilaannakortumilluunniit isumakkeerinnissinnaalernermik pisinnaalersitsisumik Naalakkersuisut 2017-imi upernaakkut ataatsimiinnermi siunnersuummik saqqummiussinissaat siunnersuutigaa.
Siunnersuut aalisarnermut, piniarnermut nunalerinermullu ataatsimiititaliamit akuersissutigineqartussatut inassutigineqarpoq, Demokraatilli siunnersuut itigartippaat.
Aappassaaniigassap tullia Demokraatineersuuvoq. Suliaritinniarlutik utaqqisut ikilisarnerisigut tamatuma inuiaqatigiit aningaasaqarnerannut iluaqutissartaqarnersoq Naalakkersuisunut misissoqqullugu siunnersuutigaat.
Ilaqutariinnermut peqqissutsimullu ataatsimiititaliami amerlanerussuteqartut, Siumumeersut Atassummeersullu, siunnersuutip itigartitsissutiginissaa inassutigaat, suliaritinniarlutik utaqqisut 2011-mit 2016-imut ikiliartorsimanerat partiit naammagisimaaramikku. Ataatsimiititaliamili siulittaasup Demokraatineersup Tillie Martinussenip siunnersuutip Inatsisartunit akuersissutigineqarnissaa kissaatigaa.
Ullormut oqaluuserisassani immikkoortut sinneri nittartakkami inatsisartut.gl-imi atuarneqarsinnaapput.
