Inatsisartuni ullormut pisussat
Kalaallit eqqumiitsuliaannut nunatta eqqumiitsulianik saqqummersitsiveqalernissaa pillugu Naalakkersuisut peqquneqarnissaannik Inatsisartuni aalajangiiffigisassatut siunnersuut siulliullugu oqaluuserineqassaaq.
Inuit Ataqatigiinneersup Muté B. Egedep siunnersuutiminut tunngavilersuutigaa Nunatta inuiaqatigiittut nunatullu ineriartornerani eqqumiitsuliat inuttut pingaartitatsinnik takutitsisut, uatsinnillu kinaassutsitsinnik tarrarsornissamut periarfissiisut puigorneqannginnissaat pingaartuusoq.
Tamanna pereerpat nunaminertat uumasuutinut neriniartitsiviusut oqaluuserineqassapput. Siumumeersoq Suka K. Frederiksen isumaqarpoq nunaminertat uumasuutinut neriniartitsiviusut nalilersorneqassasut, uumasut qassit naasoqassutsip nammassinnaanerai, taamaalillunilu piffissaq sivisunerusoq eqqarsaatigalugu tunisassiorsinnaaneq pitsaanerpaaq qulakkeerumallugu.
Kingullertullu, nunanut allanut naalakkersuisup Vittus Qujaukitsup 2016-imi nunanut allanut tunngasutigut naalakkersuinikkut ingerlatsineq pillugu nassuiaat saqqummiutissavaa.
Inatsisartut ataatsimiinnerat pisarnertut nalunaaqutaq qulinut aallartissaaq KNR2-kkullu malinnaavigineqarsinnaalluni.
