Inatsisartuni ullormut pisussat
Inatsisartunut ilaasortaq ullormit qinerneqarfimminiit aningaasarsiaqartinneqalerlunilu aningaasartuuteqarnermut tapisiaqartinneqalissasoq siunnersuutigineqarpoq, ullumikkutut innani, tassa qaammatip qinerneqarfiup aallaqqaataaniit aningaasarsiaqartinneqartinneqalerlutillu aningaasartuuteqarnermut tapisiaqartinneqartarnerat allanngortinniarneqarluni.
Siunnersuut partiinit tamanit tapersersorneqarpoq, Siumut minillugu.
Inatsisissatut siunnersuummik itigartitsinermut tunngavilersuutitut immikkut oqaatigineqarpoq qinikkatut atuuffik allatigut inuussutissarsiornermik ingerlatsinermut sanilliullugu aningaasatigut orniginarnerusariaqarmat, taamaaliornikkummi anguneqassammat nunatta ingerlatitaanerani inatsisiliortut piukkunnaatillit amerlanerusut sassarsinnaalernissaat. Isumaliutissiissummi taama ilaatigut allassimavoq.
Innarluutillit Illersuisuannik Naalakkersuisut kingusinnerpaamik aappaagu 2017-imi pilersitsinissaannik Siumut sinnerlugu Inatsisartunut ilaasortap Vivian Motzfeldtip siunnersuutaa kingorna taava oqaluuserineqassaaq.
Naalakkersuisut siunnersuut ilaannakortumik tapersersorpaat, aningaasatigulli kingunissai suli erseqqissaatigineqarsimannginnerat pillugu siunnersuutip aappassaaneerlugu oqaluuserineqarnissaata Inatsisartut ukiaru ataatsimiinnissaannut kinguartinneqarnissaa Naalakkersuisut innersuussutigivaat.
Kalaallit Nunaannut suliiffissarsiortut killilersimaarneqarnissaat pillugu Partii Naleqqap siunnersuutaa Inatsisartut taava oqaluuserissavaat, soorlu aamma Partii Naleqqap siunnersuutigigaa Namminersorlutik Oqartussat Danmarkimi nunanilu allani kiffartuussinernut aningaasartuutigisartagaasa killilersimaarneqarnissaat, misissorneqassasorlu qanoq ililluni nunatsinni kiffartuussinerit atorluarneqarnerusinnaanersut.
Inuussutissarsiutinik ingerlatsisutut aningaasaateqarfiit pillugu inatsisip atuutsilernissaa pillugu Inuussutissarsiornermut naalakkersuisup Vittus Qujaukitsup kingulliullugu taava saqqummiutissavaa.
