Inatsisartuni ullormut pisussat
Siullertut, Aningaasaqarnermut Aatsitassanullu Naalakkersuisup Randi Vestergaard Evaldsenip Nunatsinni missingersuusiornermut inatsimmik eqqussinissamik inatsisissatut siunnersuutaa siullermeerneqassaaq.
Pisortat aningaasaataasa tamarmiusut ukiut sisamat ingerlanerini oqimaaqatigiiffiunissaat sinneqartooruteqarfiunissaalluunniit taama inatsisiliornikkut qulakkeerniarneqassaaq.
Aammattaaq aallarnisaasunik ineriartortitsinermik ingerlataqarnerit piffissamut killiligaasut, tassaasut aallarnisaasunut aalajangersimasunut pikkorissaanerit, annertunerusunik inuussutissarsiornermi ingerlataqalernikkut inuiaqatigiit aningaasaqarnerannut iluaqutissartaqartitsilersussatut nalilerneqartut tapersiivigineqartarnissaannik inatsisissatut siunnersuut siullermeerneqassaaq, tamatumanilu Inuussutissarsiornermut, Suliffeqarnermut Niuernermut Nunanullu Allanut Naalakkersuisoq, Vittus Qujaukitsoq, siunnersuuteqartuuvoq.
Immikkoortut pingajuattut, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsenip siunnersuutaa siullermeerneqassaaq, tassanilu inuussutissarsiutinik ilinniarfiit ilinniakkanik piginnaanngorsaanernillu allanik neqerooruteqarnissaminnut periarfissinneqarnissaat pineqarpoq.
Inatsisartut ataatsimiinnerat nalunaaqutaq qulinut aallartissaaq, KNR2-kkullu nittartartakkatsinnilu KNR.gl-imi malinnaaffigineqarsinnaassalluni.
