Inatsisartuni ullormut pisussat
Immikkoortoq siulleq tassaavoq inuussutissarsiummik ingerlataqarneq pillugu inatsit, nioqqutissanik tuniniaanermi namminersorluni inuussutissarsiummik ingerlataqarnerup iluani aalajangersaaviusussaq.
Tuniniaanerup aallaaviatigut niuertarfimmit aalajangersimasumik sumiiffeqartumit ingerlanneqarnissaanik inuussutissarsiummik ingerlataqarneq pillugu inatsimmi atuuttumi piumasaqaateqarneq inatsimmi nutaami atorunnaarsinneqassaaq.
Inatsisissatut siunnersuummi siunertaavoq niuernermut ilusiliinerit nutaat, nutaaliorfiusut ineriartortinneqarnissaannut periarfissaqalersitsinissaq, taamaalilluni ilaatigut aallarniisutut suliaqartut nioqqutissaatiminnik tuniniaanissamut pitsaanerusunik periarfissaqalissallutik, siunnersuummi inuussutissarsiornermut, suliffeqarnermut nunanullu allanut naalakkersuisup Vittus Qujaukitsup saqqummiussassaani ilaatigut taama tunngavilersuisoqarpoq.
Immikkoortut aappaattut ilinniartitaanermut naalakkersuisup Nivi Olsenip ilinniarnertuunngorniartarneq pillugu inatsimmut allannguutissatut siunnersuut saqqummiutissavaa.
Allannguuteqartitsinermi atorfinitsitsisinnaanermik soraarsitsisinnaanermillu piginnaatitsissut ilinniarnertuunngorniarfinni rektorinut tamakkiisumik tunniunneqassaaq. Rektorit maannamut ilinniartitsisunik sulisunillu allanik atorfinitsitsinissaq soraarsitsinissarlu pillugit Naalakkersuisunut inassuteqaateqarsinnaapput.
Nunaqavissut tikisitallu akornanni Namminersorlutik Oqartussat suliffeqarfiutaanni kommuninilu sulisut qanoq agguatarsimanersut pillugu kisitsisinngorlugu paasissutissamik Naalakkersuisut saqqummiusseqqullugit peqquneqarnissaannik Siumumeersup Suka K. Frederiksenip siunnersuutaa Inatsisartut aamma oqaluuserissavaat.
Siunnersuut Naalakkersuisunit ilalerneqartoq Vittus Qujaukitsup akissuteqaataani atuarneqarsinnaavoq. Taassuma ilaatigut tikkuarpaa Nunatsinni imminut assortortumik ajornartorsiuteqartugut - suliffissaaleqineq qaffasissoq peqatigalugu nunanit allanit, nunanit avannarlernit aamma avataanit sulisussatsinnik aallertarluta.
Ullormut oqaluuserisassaq kingulleq tassaavoq Siumumeersup Nikolaj Jeremiassen siunnersutaa. Taassuma aalisarnermik piniarnermillu inuussutissarsiutillit inuussutissarsiornerannik siuarsaanermut inatsisip - ESU-p - allanngortinneqarsinnaanera, taassumalu kingunissai pillugit, misissuisoqarnissaa kissaatigaa, aalisartut siunissami inuussutissarsiutigalugu umiatsiaaqqap pissarsiarinerata nalingata 60 %-ianik inuussutissarsiornermi siuarsaanissaq pillugu taarsigassarsiisoqarsinnaanngorlugu.
