Inatsisartuni ullormut pisussat
Nalunaaqutaq ataatsimut Inatsisartut ataatsimiilerunik siunnersuutit arlalissuit aappassaanneerlugit aamma pingajussaanneerlugit oqaluuserissavaat.
Ineqarnermut, sanaartornermut, attaveqaqatigiinnermullu Naalakkersuisup umiarsualiviit pillugit Inatsisartut inatsisissaatut nutaatut siunnersuutaa inatsimmik atuuttumik taarsiisussaq siullertut oqallisigineqassaaq. Taanna akuersissutigineqassappat Namminersorlutik Oqartussat Qeqqata Kommuniata nammineq akilikkaminik umiarsualiviliornera pillugu isumaqatigiissuteqarsinnaassapput.
IA-meersup Aaja Chemnitz Larsenip piitsuussutsip killinganik aalajangersaasoqarnissaanik siunnersuutaa aamma aappassaanneerneqassaaq, siunnersuutaali taamaallaat partiianit tapersersorneqarluni.
Hans Enoksenip Partii Naleqqameersup siunnersuutaa aamma aappassaanneerneqartussaq tassaavoq isaterinissamut tapiissuteqartoqarnerani aalisarsinnaanermut akuersissutit siunissami atorunaarsinnissaat periarfissaajunnaarsinneqassasoq. Siunnersuut aalisarnermut, piniarnermut nunalerinermullu ataatsimiititaliami amerlanerussuteqartunit tapersersorneqarpoq.
Randi Vestergaard Evaldsenip Demokraatineersup Inatsisartut aamma Inatsisartut allaffeqarfianni aningaasartuutit tamanit takuneqarsinnaanngornissaat kiisalu kialluunniit paasiniaasinnaanngornissaa anguniarlugu Inatsisartut Suleriaasiata allanngortinnissaanut Inatsisartut Siulittaasoqarfiat saqqummiusseqqullugu peqquneqarnissaanik Inatsisartut aalajangiiffigisassaattut siunnersuutaa aamma aappassaanneerneqassaaq.
Siunnersuutit assigiinngitsut katillugit 13-it Inatsisartut ullumi oqaluuserissavaat.
