Inatsisartuni ullormut pisussat
Ilaatigullu soraarnerussutisiaqarnissamut aaqqissuussinermut pinngitsoorani ilaanissaq pillugu inatsisissatut siunnersuut aamma aningaasarsianit akileraarutit pillugit inatsimmut allannguutissatut siunnersuut ullumi sisamanngornermi oqaluuserineqassapput.
Aamma inatsisartuni ilaasortap attaviitsup Per Rosing-Petersenip aasaanerani nalunaaquttap nikittarnera pillugu siunnersuutigisaa oqaluuserineqassaaq. Siunnersuut Inatsisartut inatsisinut ataatsimiititaliaanni amerlanerussuteqartunit Siumumeersunit Inuit Ataqatigiinneersunillu itigartitsissutigineqarpoq.
Oqaluuserisassani soqutiginarnerpaaq - nunanut allanut politikki eqqarsaatigalugu - tassaavoq ataatsimoorussamik danskit kalaallillu USA-mik isumaqatiginninniarnissaannik Naalakkersuisut peqquneqarnissaannik Inatsisartut aalajangiiffigisassaattut siunnersuut.
USA-p Nunatsinni sakkutooqarnerata annertunerpaamik pissarsiaqaatigalugulu iluaqutigisinnaanera, tassungalu ilanngullugu amerikamiut sakkutooqarfii qimaannakkat pillugit avatangiisitigut akisussaaffiup inissinneqarnissaa isumaqatigiinniarnikkut qulakkeerniarneqassaaq.
Pisariaqarpallu, tamanna Illersornissamik isumaqatigiissutip 1951-imeersup isumaqatigiinniutigeqqinnissaa piumasaqaatigineqassasoq, siunnersuummi Inatsisartut nunanut allanut sillimaniarnermullu
ataatsimiititaliaata Washingtonimut aasaq tikeraarneranut uiggiullugu saqqumiunneqartumi tamanna oqaatigineqarpoq.