Inatsisartuni oqallinnerit kipitinneqanngitsumik aallakaatinneqartalernissaat piumaneqarpoq

Inatsisartut ataatsimiinneranni innuttaasut periarfissaqartariaqartut tamakkiisumik Inatsisartut ataatsimiinneri radiukkut tusarnaassallugit, maannakkut Inatsisartut ataatsimiinneranni kipisaqattaartumik aallakaatineqartarput, taamatut allagaqarpoq, inatsisartuni ilaasortaq Kristian Jeremiassen Siumut, inatsisartut siulittaasuannut Josef Motzfeldtimut allakkamini.

Josef Motzfelt akissuteqarnermini nassuiaateqarpoq aallakaatitseriaatsimik Digitaliusumik

DVB-T-mik (Digital Video Broadcasting Terrestrial) pilersitsinissamik naalakkersuisuni sulissutigineqartoq, tamatumani ullumikkut pissutsinut naleqqiullugu nuna tamakkerlugu TV-kkut aamma radiukkut kanaalit amerlanerusut pilersinnissaannut periarfissiilluni.

Josef Motzfeldt akissuteqarnermi oqarpoq immikkut FM-imi kanaalimik pilersitsineq 11 mio. kr.-t missaani akeqarmat tassunga ilanngunneqarlutik ingerlatsinermut aserfallatsaaliinermullu akissaajaatit.

Inatsisartut siulittaasuata Josef Motzfeldtip erseqqissarpaa inatsisartut ataatsimiinneranni oqallinnerit qarasaasiakkut malinnaaffigineqarsinnaammata, tamannali akisusoq.

Aallakaatitseriaatsimik nutaamik digitaliusumik pilersitsinissamut isumaqatigiissut naammassippat akissaajaatissatissallu paasinarsippata Siulittaasoqarfiup suliaq nangillugu ingerlatissagaa Josef Motfeldt allappoq. Inatsisartut ataatsimiinnerisa kipisaqattaanngitsumik soqutiginnittunit malinnaafigineqarsinnaanissaat suli anguniagaasoq neriorsuuteqarpoq.