Inatsisartuni marlunngornermi pisussat
Marlunngornermi ataatsimiinnermi oqaluuuserineqartussat immikkoortut aqqaneq marluupput.
Innaarluutillit pillugit inatsisissatut siunnersuut siullermeerlugu oqaluuserineqassaaq.
Inatsisissaatut siunnersuutip siunertaraa, innarluutilinnut tapersersuinissaq, sapinngisamillu amerlanerusut namminerisaminnik ineqarnissaat.
Namminersorlutik Oqartussat Kommunillu akornanni oqartussaaffiit pisinnaatitaaffiit pisussaafiillu agguataarneqarnerat ersarissarneqassapput.
Christina Johnsen septemberip aallaqaataanni innarluutillit illersuisuiattut toqqarneqarpoq, aamma nuna tamakkerlugu inaarluutilinnut sullissivik pilersaarutit naapertorlugit ukiormanna ukiakkut ammarneqartussaagaluarpoq.
Partiinut tapiissutinut siunnersuut ataatsimiinermi oqaluuserineqartussat naapertorlugit, marlunngorpat aalajangiiffineqassaaq.
Demokraatit attaviitsorlu Michael Rosing, siunnersuutip aappassaaneerneqanerani akerliullutik taasipput.
Partiinut tapiissutit qaffanneqarnissaannut siunnersuut akuerineqarpat, nunatta karsianut ukiumut 2,8 million kr- nik aningaasartuutaanerulissaaq.
Nunatta karsiata naatsorsuutaasa akuerineqarnissaat inatsisartut marlunngornermi oqaluuserisassaannut ilaavoq, taanna inatsisartut kukkunersuinermut ataatsimiititaliaani suliarineqareerluni, akuersissutigineqarnissaa aalajangiiffigineqassaq.
Inatsisartut marlunngornermi ataatsimiinneranni oqaluuserissaanni kingulliit ilaat tassaavoq Inatsisartut ombudsmandiata 2016-mi ukiumoortumik nalunaarutaa.
Inatsisartuni inatsisit pillugit ataatsimiititaliap siunnersuutigaa, ombudsmandip nalunaarutaa 250-nik qupperneqartoq tusaatissatut tiguneqassasoq.
Tamannalu Naalakkersuisut isumaqatigigaat, Naalakkersuisut siulitaasuata Kim Kielsenip akissuteqarluni allagaani atuarneqarsinnnaavoq.
