Inatsisartuni kalaallisuinnaq oqaluttoqalernavianngilaq
Tassalu Siumut taama siunnersuuteqaraluaruni naammattunik taaseqatissaqanngilaq.
Naalakkersuisut siulittaasuata, Kuupik Kleistip, oqaluttarfiit pingaarnersaat pillugu oqallinneq sakkortooq ullumi oqaseqarfigaa.
- Taanna suliassatsinni salliutinngilarput. Aamma apeqqutaavoq, qanoq ajornartorsiutaatiginersoq, inuiaqatigiinni qallunaatut oqaluttortatta ilaasa inatsisartunut qingigaasimanerat? Aamma apeqqutaavoq, pisinnaatitaaffitsik naapertorlugu qinigaasimasut ilumut inuiaqatigiinni ajornartorsiutitut annertuutut isigineqartariaqarnersut, naalakkersuisut siulittaasuat aperaaq.
Taannalu kaammattuivoq, amip qalipaataa, upperisaq oqaatsilluunniit apeqqutaatinnagit innuttaaqataasut tamarmik ataqatigiissasut, erseqqissarlugulu kikkut tamarmik pisortanit ajunngitsumik kiffartuunneqartariaqartut.
- Aamma sulisinnaassuseqartut sullisserusuttullu tamaasa inuiaqatigiinni kalaallini atorfissaqartippagut, isumaqarpungalu immikkoortitsinissaq pissusissamisuunngitsoq, Naalakkersuisut siulittaasuat oqarpoq.
Kuupik Kleist-ip eqqaasitsissutigaa, oqaatsinut politikki pillugu inatsisissamik Naalakkersuisut siunnersuuteqarmata, Inatsisartut ukiarmi oktobarimi siullermeerlugu oqaluuserisaannik upernaarulu oqaluusereqqitassaannik.
Tamatuma kinguneranik kalaallit oqaasiisa nukittornissaat, Naalakkersuisut siulittaasuata ilimagaa.
- Assersuutigalugu immaqa maani Nuummiunerusoq piumasaqaataasassaaq, pisiniarfinni kalaallisut aamma allagartalersuisoqartassasoq. Soorluttaaq oqaatsitta ilinniartitsissutigineqarnerat aammalu kalaallit oqaasii toqqammavigalugit ilinniartitsineq periarfissarissaarnerulissasoq.
Ukiuni 30-ni kingullerni innuttaasut kalaallisut oqalussinnaanngitsut amerlisimasut Naalakkersuisut siulittaasuata unnerpaa.
- Aamma inuiaqatigiinni kalaallini kikkut tamaasa kalaallisut oqalutsilerniarlugit nukiit aningaasallu ulloq manna tikillugu immikkoortinneqarsimasut naammassimanngillat. Tamatumalu imaalitsiaannarluni qaangerneqarnissaa unga takorluunngilara, naalakkersuisut siulittaasuat Kuupik Kleist oqarpoq.
