Inatsisartuni ataasinngornermi pisussat
Inatsisartummi ataatsimiittarfissaannik siunnersuut ullumi oqaluuserineqartussaavoq, Inatsisartullu Aningaasaqarnermut Akileraartarnermullu ataatsimiititaliaata nutaamik sanaartornerup qanoq akeqarnissaanut tunngatillugu apeqqutit akissutissarsineqanngitsut suli amerlavallaarsorai.
Ataatsimiititaliallu allannguutissamik siunnersuuteqarneratigut Siulittaasoqarfik sanaartornissaq pillugu isumaqatigiissuteqarsinnaanngikkallarpoq. Taarsiullugu, suliniummut aningaasartuutissanullu tamarmiusunut allaaserinnittoqassaaq, aamma nutaamik sanaartortoqarani illorsuup maanna piusup nutarteriffigineqarneratigut pitsaaqutit ajoqutillu nalilersuiffigineqassapput, ataatsimiititaliaq taama isumaqarpoq.
Inatsisartut ataatsimiittarfittaarnissaanik siunnersuutip saniatigut aamma innarluutillit sullinneqarnerat eqqartorneqassaaq. Innarluutillit illersuisuannik pilersitsinissamik siunnersuut aappassaaneerneqassaaq siunnersuutigineqartorlu amerlanerussuteqartunit tapersersorneqarpoq.
Aamma innuttaasunut innarluutilinnut maanna Danmarkimiittunut sullissivimmik pilersitsinissamut periarfissat misissorneqarnissaannik siunnersuut Inatsisartut oqaluuserissaavaat.
Inatsisartut ullormut oqaluuserisassaat katillugit arfineq-marlunnik immikkoortortaqarpoq.