Inatsimmik nutarterineq ingerlateqqinneqarpoq
Aalisarnermut pisuussutinullu akitsuusiisanermut inatsisip nutarterneqarnerata suliarinerata ingerlaqqinnissaanut siunertat tunngavissallu Naalakkersuisut akuersissutigaat. Suleriaqqinnissami kattuffiit aningaaseriviillu akuutinneqassapput.
Aalisarnermik inuussutissarsiornermi periarfissat sapinngisamik patajaatsuussapput, aningaasaliissutit qulakkeerumallugit aningaasaliissutinut qularnaveeqqusiisoqarsinnaassalluni pissarsinartumillu aalisarneq siuarsarneqarluni, taamaalilluni aalisariutit nutaaliaasut nunamilu aalisakkeriviit aserfallatsaalinissaannut nutarternissaannullu aalisarnermik inuussutissarsiuteqartut periarfissaqaleqqullugit.
Sinerissamut qanittumi aalisarnermi naleqqussaanermut aamma aalisariutinut nioqqutissiorfinnullu aningaasaliinerit sapinngisamik namminersortunit pissapput aamma avataasiorluni aalisarneq suli namminersortunit aningaasaliiffigineqassaaq.
Aningaasaqarnermut Nunamullu Namminermut Naalakkersuisup Vittus Qujaukitsup oqaatigaa, Aalisakkanik isumalluutitsinnik tamanik iluaquteqarneq siunissami ataatsimut isigalugu isumalluutinik iluaquteqarnermik ilusiliinikkut akitsuuserneqarsinnaassasoq.
- Ullumikkummi taamaallaat avataasiorlutik aalisartut angallatillu nammineerlutik tunisassiornissamut akuersissuteqarfigineqartut aalisakkanik iluaquteqarsinnaanerminnut nunap karsianut akitsuutinik akiliisarmata, Vittus Qujaukitsoq oqarpoq.
- Sinerissamut qanittumi aalisarnermi killissarititaasutigut atugassarititaasut pitsaanerulersinnerisigut pissutsinullu naleqqussaanikkut isertitaqarnerulersinnaanissaq aqqutissiuunneqassaaq, soorluttaaq aamma siunissami aalisariutit ilarpassuinit nunatta karsianut isertitsisarnissaq qulakkeerneqarsinnaassasoq, Aningaasaqarnermut Nunamullu Namminermut Naalakkersuisoq Vittus Qujaukitsoq aalisarneq pillugu siunissami politikki pillugu ilaatigut taama oqarpoq.