Inassuteqaatit politikerinit isumaqatigiinngissutaapput

Partiili ataaseq ingerlaannaq nangaanertaqanngitsumillu tapersersuivoq.

- Demokraatitut naalakkersuisunilu ilaasortatut isumaqarpunga, inassutit pitsassuusut, kisimalu aalajangiissagaluaruma sapinngisamik amerlasuut malinneqassangaluarput, Palle Christiansen oqarpoq.

Taassuma ingammik amerlanerit pitsaanerusumik ilinniartinneqarnissaasa pisariaqassusia aammalu sulinissaq pilerinarneruleqqullugu akileraarutit appasinnerunissaannik inassut akuersaarpai.

Ilinniartitaanermut akissaqaleqqulluta ilaatigut pensionit akileraaruserneqartalernissaat, Palle Christiansenip maannangaaq sulissutiginiarpaa, iluarsaaqqinnerillu annertuut piffissaq qaninnerpaami piarersarneqalernissaat aamma sulissutiginiarlugu.

- Suliassat maanna aallartinneqarsinnaasut maanna aallartinneqartariaqarput. Inassutit taperserlugit, Nunatsinni politikerit tamarmik naapeqatigiissuteqarnissaat pingaarpoq. Taamaalilluta sivisuumik atasinnaasunik iluarsaaqqissinnaaniassaagut, imaanngitsoq qinersivimmiit qinersivimmut allanngortinneqarsinnaasunik, Palle Christiansen oqarpoq.

Pinngortitami pisuussutinik atuinermi akileraarusersuisoqalernissaanik siunnersuut

Illua tungiiliuttuni nuannaarutigineqaqaaq. Kisianni tamatuma saniatigut Naalakkersuisoqatigiit arlaatigut tapersersussallugit neriorsuinianngillat. Siumummi isumaqarpoq, akileraarutit appartinnissaat ataatsimiititaliap isiginiarpallaaraa, suliffissanik nutaanik ujartuinatik.

- Isumaqarpunga, inuiaqatigiit suliumassuseqalernissaat ajornartorsiutini qitiunngitsoq. Inuit sulerusukkaluarput, kisianni suliffissaqanngillat. Taamaattumik suliffissanik nutaanik pilersitsoqanngippat, ajornartorsiut una qaangerneqarnavianngilaq, Siumup siulittaasua Aleqa Hammond oqarpoq.

Taassuma kissaatigaa, politikerit inassuteqaatiinut akuersaalertigatik, innuttaasut isumaat tusarniaqqaassagaat.

Suliffissanik pilersitsinissap pingaarluinnassusianik, Siumup oqarnera Atassutip isumaqatigaa, Atassummili isumaqarput, ingammik aatsitassanit isertitaajumaartut suli nalunarmata, taakkua tunngaviginiarneqarsimannginnerat, ataatsimiititaliamit silatusaarnerusoq.

Akileraarutit appartinneqarnissaanik aammalu ilinniartitaanerup aallunnissaanik inassuteqaatit taassuma tusaannarlugu isumaqatigai. Inassuteqaatinili akitsuutit siunnersuutigineqartut amerlavallaartut isumaqarluni.

Tassami ataatsimiititaliap inassutigaa, sulinikkut isertitanit akileraarutit appartinneqarnerat, ilaatigut avatangiisinut akitsuutinit, pensionit akileraarusernerisigut, aammalu pigisat nalillit akileraarusersornerisigut matussuserneqassasut.

- Suliffinnik pilersitsiortorutta, aningaasat amerlanerusut kaaviiaartissinnaavagut, akitsuutillu taamaasillutik pingaaruteqarpallaartariaqanngitsut, Atassummi isumaqarpugut, Inatsisartunut ilaasortaq Knud Kristiansen oqarpoq.

IA-p politikkikkut oqaaseqartartuata, Aqqaluaq B. Egede, ataatsimiititaliap inassuteqaatai ataasiakkaat maanna isummerfigerusunngilai, innuttaasulli oqallinnissaat utaqqeqqaarumallugu.

Kisianni ataaseq nalunanngilaq, tassalu allannguisoqartariaqarpoq.

- Namminersornermut atatillugu inuiaqatigiittut siunnerfigissallugit isumaqatigiissutiginikuusavut aningaasassaqartinniassagutsigit, inuiaqatigiinnilu naligiinnerusumik atugaqarnissarput piviusunngortissagutsigu allannguisoqartariaqarpoq, Aqqaluaq B. Egede oqarpoq.

Kattusseqatigiit Partiiata siulittaasuata, Anthon Frederiksenip, ataatsimiititaliap inassutai iluarisimaarpai, ingammik isumaginninnermut akileraartarnermullu inatsit paasiuminarnerulernissaannik inassuteqaatit nuannaarutigalugit.