Inassuteqaatit malillugit Naalakkersuisut rajartassiiniarput
Aalisarnermut soqutigisaqartut maanna tusarniaffigineqarput. Kisianni Ane Hansenip naatsorsuutigaa, inassuteqatit malillugit kitaani raajartassat ukioq mannatut 110.000 tonsiussasut.
- Aalisartut siunissami aalisagassaaqartuassappata, peqassutsimut naleqqussartuarnissaq pingaartorujussuuvoq. Taamaattumik biologit siunnersuinerisa malinnissaat, Naalakkersuisuniit pingaartutut isigivarput, Ane Hansen oqarpoq.
Raajartassat 2010-mi 110.000 tonsiuinnarnissaat inassutaavoq. Taanna malinneqanngippat aarlerinartoqarsinnaasoq, Pinngortitaleriffimmiit oqaatigineqareerpoq.
Atlantikup Avannaata Kitaani Aalisarneq Pillugu Suleqatigiiffimmi, NAFO-mi, Imavinnilu misissuinerit pillugit nunat tamalaat siunnersuisartoqatigiiffianni, ICES-imi, ataatsimeereernerup kingorna raajartassat 110.000 tonsiunissaat biologit siunnersuutigaat.
Kisianni siorna pisassiissutit tamakkerneqanngitsoormata, pisarinngitsuukkat ukioq mannamut nuunneqarput. Tassalu ukioq manna raajartarineqarsinnaasut 135.000 tonsiupput. Aalisarneq pillugu inatsimmi, maanna atuutttumi, tamanna periarfissaavoq.
Aalisarnermut naalakkersuisup naatsorsuutigaa, ukioq manna raajartassat tamakkerneqassanngitsut.
- Ukioq aalajangersimasumi pisarinngitsuukkat ukiup tullianut nuunneqarsinnaapput, taamaalillutik aappaagukkut apriilip 15-iata tungaanut aalisarneqarsinnaallutik, Ane Hansen oqarpoq.
Tassalu imaassinnaavoq, raajarniat aappaagu pisaat ukioq mannatut amerlatigisut. Taakkua inatsisit malillugit agguataarneqassapput, pisassat 57 procentii avataasiorlutik raajarniartunut, 43 procentiilu sinerissamut qanittumi raajarniartunut pisassiissutigineqassallutik.
Kitaani aappaagu 2010-mi raajartassatut Pingortitaleriffimmit inassutit malinnissaat siunertaralugu aalisarnermik soqutigisaqartut decembarip qulingata tungaanut tusarniaaffigineqarput.
