Imminortarneq akiorniarlugu aningaasaateqarfik pilersinneqalerpoq
Aningaasaateqarfimmik pilersitsiniartoq tassaavoq, Charlie Watt, taanna naggueqatigiit Inuit Senatimut ilaasortaatitaasa marluusut aapparaa, taassumami imminut toquttarneq qanigisaminut tunngatillugu misigisimavaa.
Nunavummi, Nunavimmi aamma Nunatsiavummi ajornartorsiutit annersaasa ilagaat imminut toquttarneq. Ingammik angutit 15-it 30-llu akornanni ukiullit inuunertik alianartumik taama annaasarpaat, aammattaarli arnat inuusuttut amerliartuinnartut tamanna toqqartalerpaat.
Naggueqatigiit Inuit akornanni imminut toquttartut Canadamiunut allanut sanilliullugit aqqanileriaammik amerlanerusut, kisitsisit ersersippaat. Nunavummi imminut toquttartut amerlanerupput, Canadallu Issittortaata kippasinnerusuani Inuvialunni akuttunerullutik.
Canadami naggueqatigiit Inuit kattuffiat, Inuit Tapiriit Kanadami, sapaatip akunnerani kingullermi ukiunik 40-nngortorsiorluni nalliuttorsiormat, Senatimut ilaasortaq Charlie Watt, naggueqatigiit inuusuttaasa imminut toquttarnerat pillugu, killisimanartumik oqalugiarpoq.
- Imminut toquttarneq aqqutissaanngimmat, qinnuigaassi paaseqqullugu naggueqatigiittut ileqqutsinnut tamanna ilaanngimmat. Inuunitta qaqugu qanorlu naanissaa uagut aalajangissallugu akisussaaffiginngilarput, Charlie Watt oqarpoq.
Senatimut ilaasortap taassuma ikinnguterpassuarmi, ingammillu nammineq ernuttami, imminut toqunnerata kingorna, imminut toquttarneq qanimut misillerfigisimavaa.
Taamaattorli inuusuttut taama aalajangertariaqartarnerat oqaluuseriinnarnagu annerusumik iliuuseqarfigerusuppaa. Taanna nammineq aterminik taaguutilimmik aningaasaateqarfiliornialeruttorpoq. Tamatumuunakkut naggueqatitta Inuit inuusuttaasa ajornartorsiortut kingusinaartoqartinnagu iliuuseqarfiginissaat anguniagaavoq.
Canadami suliffeqarfiit annerit arlallit aningaasaateqarfissamut tapiinermikkut tapersersuilereersut oqaatigineqarpoq. Charlie Wattip Aningaasaateqarfia, ukiortaap aallartinneranit pisortatigoortumik atuutilersinniarneqarpoq.
