Immikkut pisariaqartitsisut ukiukilliartorput
Meeqqat immikkut pisariaqartitsisut ukiukilligaluttuinnarnerannik oqariartuuteqarneq, pitsaasutut taaneqarsinnaasoq, Camilla Nymand Petersenip Meeqqanik Inuusuttunillu Siunnersuisarfimmi (misi)-mi ningiuusup oqaatigaa
-Taassuma takutiinnarpaa suliniuteqarneq ajunngitsumik ingerlasoq, periarfissat atorluarneqaleriartornerat qujarullugu atorneqartoq pitsaasumik isigisariaqarparput, Camilla Nymand Petersen oqarpoq.
Ilanngullugu oqaatigaa meeqqat ukioqqortusereersut ikiorniarneranni nukippassuarnik atuinermiit oqinnerusartoq ukiukinnerini sullissineq aallartinneqaraangat.
Nuup illoqarfiani atuartuinit 3.000-it missaanniittunit, atuartut immiikkut pisariaqartitsisut 40-it missaat ilinniartitsisunit ilinniarsimasunit qulinit isumagineqartaqqammerput. Hans Peter Brobergillu Kommuneqarfik Sermesuup atuarfineqarnermut pisortaata oqaatigaa atuartut immikkut pisariaqartitsisut ukiukilligaluttuinnartut.
- Atuartut immikkut pisariaqartitsisut amerliartornikuugaluarput, ukiunilu kingullerni aamma takussaalernikuuvoq immikkut pisariaqartitsisut allaat 2. klassi tikillugu atuartuutigisalerlutigit, tassa arfineq marluk arfineq pingasut missaanni ukiullit, Hans Peter Broberg KNRimut oqarpoq.
Taassuma oqaatigisinnaangilaa meeqqat immikkut pisariaqartitsisut sooq ukiukilligaluttiunnarnersut, oqaatigaluguli angajoqqaat perorsaanerat pissutaasut ilagisinnaagaat.
