Immikkut ilisimasallit: USA-p Canadallu Kalaallit Nunaata silaannartaa nakkutigisariaqaraluarpaat
Sermersuup silaannartaani ingammillu Avannaata Tunullu sineriaata silaannartaanni susoqarpa?
USA-p Canadallu sakkutuuisa politikeriisalu aammalumi Issittumi Sakkutooqarfiup silaannartani taakkunani susoqarpiarnersoq nalukkajuppaat.
Nunatsinnimi oqartussat danskillu illersornissaqarfiata Issittumi Sakkutooqarfiata nunatta tamatumalu imartaasa silaannartaanni tamakkiisuumik nakkutilliinngillat.
Rusland siooratitsisoq
Taamaammat kunngeqarfik Danmark Canadap USA-llu Issittumi illersornissamut nakkutilliinermullu suleqatigiiffiannut NORAD-imut ilannguttariaqartoq, immikkut ilisimasallit USA-mi isummersuisit Rand Corporationimeersut isumaqarput.
- Kalaallit Nunaata silaannartaa nunanit allaneersunit pitsaanngitsumik sunnerneqariaannaavoq. Canadamik USA-millu toqqaannartumik suleqateqarneq naalagaaffeqatigiinnik NATO-millu suleqateqarnerminngarnit Kalaallit Nunaata silaannartaani nakkutilliinerusoqalerneranik kinguneqarsinnaavoq, Rand Corporationimi ilisimatusartuuneq Michael Bohnert Politikenimut oqarpoq.
AAMMA ATUARUK Danmark nunatsinni nakkutilliinerorusuttoq
Rusland siooratitsimmat USA-p sakkutuunik nunatta eqqaatalu taavalu Amerikap avannarliup eqqaata silaannartaatigoortoqartarnersoq paasisaqarusunneranut peqqutaanerpaavoq.
NORAD suua?
Norad North American Aerospace Defense Commandimut, 1958-imi pilersitaasumut, naalisaataavoq.
Canadamiut amerikamiullu Issittumi illersornissamut nakkutilliinermullu suleqatigiiffigivaat, taakkulu nunagisamik sakkutooqarfiini Pituffimmilu sakkutooqarfimmi radareqarput, nakkutilliissuteqarput timmisartoqarlutillu.
Cheyenne Mountainip eqqaani USA-mi Coloradomiittumik qullersaqarfeqarpoq.
Københavns Universitetip sakkutooqarnermik misissueqqissaarfiata pisortaa Kristian Søby Kristensen DR P1 Orientering Udsynimut taama oqarpoq.
- Amerikamiut russillu akaarinngisariinneruleriaannaammata Issittoq Kalaallit Nunaallu pingaaruteqarneruleqqeriaannaapput. Tassalumi qaartartorsuarnut ungasimut igeriuttakkanut atomitalinnut Ruslandimiit USA-mut illuanullu aqqut Qalasersuarmik Kalaallit Nunaannillu qulaassigaanni qaninnerpaavoq, taanna oqarpoq.
Nunarput Danmarkip ilaasortaaneratigut NATO-mi ilaavoq.
Isertortumik angallavigisarunaraat
Kunngeqarfik Danmark NORAD-imut ilannguppat danskit politikeriisa USA-p sakkutuui nunatsinni sulerisarnersut ilisimasaqarfiginerulissagaat, Kristian Søby Kristensen oqarpoq.
Kunngeqarfik Danmarkip Noradimut ilanngunnissaa qanoq pingaartiginersoq, taassuma oqaatiginngilaa. USA-lli sakkutuui nunatsinni qanoq suliaqartigisarnersut Issittumi Sakkutooqarfiup aamma nunatta Danmarkillu politikeriisa ilisimarpianngikkaat erseqqissaatigaa.
USA Canadalu tamanna pillugu oqaloqatigisimaneraat Noradimulluunniit ilanngutilersaarnersut, danskit illersornissamut ministereqarfiannut apeqqutigaarput.
Ministereqarfimmit akissutisinissarput utaqqivarput.
