Kalaallit Nunaat USA-p isumannaatsuunissamut politikkianut pingaaruteqarluinnarpoq. Issittumi sillimaniarnermut tunngasunut immikkut ilisimasallit naliliipput. Toqqorsivimmit assiAssi: Flickr Commons

Immikkut ilisimasallit Pituffimmut isumaqatigiissut pillugu: Kalaallit Nunaat Washingtonimi pingaaruteqarluinnarpoq

Pituffimmi kiffartuussinissamik isumaqatigiissut atsiorneqarpoq. Isumaqatigiissut nunatta USA-mut qanoq pingaaruteqartigineranik takutitsisoq, issittumi sillimaniarnermut politikkimut tunngatillugu immikkut ilisimasallit isumaqarput.

Pituffimmi kiffartuussinissamut isumaqatigiissutit pillugit ukiuni arfinilinni isumaqatigiinngittoreersorlu nutaamik kiisami isumaqatigiissuteqartoqarpoq.

Tamannalu USA-p nunatsinnut Danmarkimullu atassuteqarnerminik ilungersuussineranik ersarissumik takussutissaavoq.

Københavns Universitetimi nunanut allanut tunngasunut politikki pillugu matumani Issittoq ilanngullugu ilisimatooq, Kristian Søby Kristensen naliliivoq.

AAMMA ATUARUK Steen Lynge: Præsidentimut qinersisoqannginnerani Pituffik pillugu isumaqatigiinniarnissaq piviusorsiorpoq

Kiffartuussinissamut isumaqatigiissut maanna atuuttoq amerikamiut ingerlatseqatigiiffiannut isumaqatigiissutaasoq 2024-mi qaangiuttussaavoq. Tamatuma kingorna ingerlatseqatigiiffik nunatsinniittoq kiffartuussinissamut isumaqatigiissuteqarfigineqassaaq.

Suliaq pillugu naatsumik

Pituffimmi kiffartussinissamut isumaqatigiissutinut suliaq 2014-imi allartippoq. 

Tassani USA-p isumaqatigiissut amerikamiut pigisaannut ingerlatseqatigiiffimmut tunniuppaa.

Isumaqatigiissut taanna tamatuma siornatigut danskinut kalaallinullu ukiorpassuarni isumaqatigiissutaasarsimavoq. Nunattalu karsianut ukiumut 200 millionit koruuninik iluanaarutaasarsimavoq.

Illersornissamulli isumaqatigiissut naapertorlugu kiffartuussinissamut isumaqatigiissut danskit/kalaallillu ingerlatseqatigiiffiata tigummisussaavaa.

Taamaammat kuungeqarfik naapertorlugu amerikamiut ingerlatseqatigiiffiata 2014-imi isumaqatigiissuteqarfigineqarnera USA-p Kunngeqarfiullu akornanni isumaqatigiissummut akerliuvoq.

Vectrus Services 2024-mut isumaqatigiissuteqarfigineqarpoq. 

Ingerlatseqatigiiffiup aqutsisui nunatsinni najugaqartuussapput.

- Piffissap taama sivisutigisup ingerlareernerani isumaqatigiissuteqartoqarnera amerikamiut tungaanniit kalaallit danskillu ernumassutaannik eqqarsaataannillu akuersortoqarneranut takussutissaavoq, Kristian Søby Kristensen oqarpoq.

Nutaamik præsidentitaaraluarunilluunniit isumaqatigiissutaassasoq

Isumaqatigiissut amerikamiut præsientimut qinersinissaannut sapaatip-akunneraajunnaartorlu atsiorneqarpoq.

Præsidentimullu qinersisoqarnera isumaqatigiissuteqarnissamut piffissaq akunnassinnaagaluarpoq – imarisaali allanngornaviarnani, Illersornissamut ilisimatusarfimmi lektori Issittumilu sillimaniarnermut politikki pillugu ilisimatooq, Jon Rahbek-Clemmensen naliliivoq.

USA-mimi Demokraatit Pituffimmi nutaamik kiffartuussinissamut isumaqatigiissuteqarnissaq Kalaallit Nunaannut attaveqaatimik attassiinnarnissamut ineriartortitsinissamullu pisariaqartoq isumaqataaffigaat.

AAMMA ATUARUK Pompeo i København: Vi har diskuteret Arktis og Pituffik

- Demokraatit republikaneritulli isumaqarput, tassa USA Issittoq pillugu arajutsilaarsimagunarpoq: Isumannaatsuuniarnermi amigaatit iluarsaannissaat Kalaallit Nunaannullu pitsaanerusumik atassuteqarnissaq maanna pisariaqalerpoq, immikkut ilisimasalik oqarpoq.

Republikanerillu Trumpip præsidentiunerani tamanna isumaqatigiissutigineqartoq perruualaarutigisinnaavaat.

- Republikanerit maanna præsidentiusup ajorsariartulernera immaqa takusinnaavaat. Taamaaammat suliniutip matuma maanna aallartinnera isumassaqarluarpoq, taamaalillutik tulliani allaffeqarfissaanngitsup kisianni namminneq allaffeqarfimmi tamanna ataqqinaatitut tigummisinnaallugu, Jon Rahbek-Clemmensen oqarpoq.

Isumaqatigiissut iluareqqusaanerup ilagigaa

USA-p isumannaatsuunissaanut Issittup qanoq pingaaruteqartiginera pillugu USA-p paasinninnissaanut piffissaq sivisusimasoq, Jon Rahbek-Clemmensen Kristian Søby Kristensenilu isumaqarput.

Taamaakkaluartorli præsidentip illorsuata allaffeqarfia ukiuni kingullerni marlunni-pingasuni iluareqqusaarsimavoq.

USA ilaatigut Nuummi sinniisoqarfimmik ammaavoq Kalaallit Nunaannullu ”ikiorsiissutitut” ittunik sinniisunut 83 millionit koruuninik tapiissuteqarluni.

- Amerikamiut Kalaallit Nunaannut pitsaanerusumik atassuteqaammik pilersitsiniarsarinerminni

- USA-mut qanimut atassuteqarnermi Kalaallit Nunaannut aamma iluaqutissartaqartoq takutinniarsaralugu amerikamiut Kalaallit Nunaannut pitsaanerusumik atassuteqaammik pilersitsiniarsaripput, Jon Rahbek-Clemmensen oqarpoq.

Amerikamiut nunanut allanut tunngasunut ministeriata, Mike Pompeop København aggustimi tikeraarpaa. Tassanilu Trumpip allaffeqarfia Pituffimmi kiffartuussinissamut isumaqatigiiissutit pillugit nutaamik isumaqatigiissuteqarnissaq piareersimaffigigaa oqaatigaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat