Immikkut ilisimasalik: Naalakkersuisooqatigiinnissamik isumaqatigiissut akunnattumik pitsaassusilik

Politikkimut tunngasunik oqaaseqartartup nersualaarinninnissamut isornartorsiunissamullu pissutissaqarsorinngilaa.

- Isumaqatigiissut akunnattumik pitsaassusilik, oqarpoq.

Jakob Janussenip naalakkersuisooqatigiinnissamik isumaqatigiissutip inuiaqatigiinni pitsanngorsaatissanik amerlasuunik imaqarnera tikkuartorpaa. Anguniakkalli qanoq iliorluni anguniarneqarnisaat aningaasallu suminngaanneernissaat nalornissutigivaa.

- Naalakkersuisooqatigiinnissamik iaumaqatigiissut naliliiffigissallugu nalunarpoq, qulequtaannaanerusunik imaqarmat anguniakkallu qanoq iliornikkut anguniarneqarniarnersut oqaatigineqanngimmat, Jakob Janussen oqarpoq nangillunilu:

- Isumaqatigiissummi aamma isumaqatigiissutip kingunerisaanik aningaasartuuteqarnerunissaq aningaasalersorniarneqarnersoq oqaatigineqanngilaq.

Partiit sunniuteqarfigisimasaannut tunngatillugu Jakob Janussenip partiit pingasuullutik sunniuteqaqataasimanerat isumaqatigiissummi takusinnaanerarpaa.

- Ataatsimut isigalugu isumaqarpunga isumaqatigiissummi partiit pingasuusut kissaatigisimasaat oqimaaqatigiissumik ilaatinniarneqarsimasut.

Akuersaanngilluinnarnermut apeqqummut tunngatillugu naalakkersuisooqatigiit qanoq iliorniarnersut pissangartutut isigaa. Tamannami Partii Inuinut ajornartorsiuterujussuanngorsinnaavoq. Aammattaaq oqaatsinut politikki naatsorsuutigineqarsinnaasutut imartuallaanngilaq.  

- Partii Inuinit kissaatigineqartut qiviarutsigit kalaallit oqaasiisa atorneqarnerunissaanik oqariartuutaat soorlulusooq suujunnaarsinneqarsimasoq malunnarpoq.

Jakob Janussenittaaq kalaallisut atuartitsissutissanik neriorsuuteqarneq isornartorsiorpaa, atuakkammi suminngaanneernissaat eqqaaneqarsimanngilaq.

- Atuartitsissutit nutaat qilammiit nakkaannarnavianngillat. Tamakku suliarissallugit akisuupilussuupput.

Politikkimut tunngatillugu oqaaseqartartoq isumaqarpoq Atassutip isumaqatigiissut sunniuteqaqataaffigilluarsimagaa.

- Atassutip kissaatigisani tamaasa ilanngunnissaat iluatsissimarpasippaa, aammami partiip anguniagai assersuutigalugu Siumup anguniagaanit allaaneruallaanngimmata.

Jakob Janussenip aamma maluginiarpaa Atassut Partii Inuillu naalakkersuisoqarfinnik pingaartutilinnik tunineqarsimasut, Steen Lyngellu Miiti Lyngellu suliassaqarluarnissartik qularissanngikkaat oqaatigalugu. Jakob Janussenili naapertorlugu Siumut pissaanermik tigummiaqarnerpaavoq.

Aningaasaqarnermut tunngatillugu Jakob Janussenip aalisarnermut tunngatillugu pilersaarutit kivitsisinnaanerat qularivaa, aamma aatsitassarsiornerup aallartinnissaanut piffissaq sivisuup ingerlanissaa ilimaginerarpaa.

- Pisuussutinik uumaatsunik atorluaasoqalernissaa naammagittarluta utaqqisariaqassuarput.

Tamatumunnga pissutaasut annersaraat royalymik eqqussisoqartussanngornera, tamannalu aningaasaleerusussinnaasut uniinnarnerannik kinguneqarsinnaammat.

- Ingerlatseqatigiiffiit aallartisarniassagunik aningaasarpassuarnik aningaasaleeqqaartariaqassapput, asuli ajunngitsuliorniaannarlutik aallartisarnavianngillat. Aningaasarsiornissamik siunertaqarput.