Immikkoortortaqarfiit: Alfred Jakobsen soraarsitaavoq
Ulloqeqqanut radioaviisimi oqaluttuaraarput, KNAPK-p pisortaa, Alfred Jakobsen atorfimminit taamaatissimasoq.
KNAPK-p tungaaniit tamanna paasissutigineqarpoq, kattuffiup ilaasortanut aviisiani ippassaq saqqummersumi, Sineriassortumi qupperneq 11-mi.
Tusatsiakkat naapertorlugit, Alfred Jakobsen soraarsitaasimavoq partiimut Inuit Ataqatigiinnut attuumassuteqarpallaarnera tunngavigalugu. Tamannalu uppernarsiniarlugu Radioaviisimit paasiniaasimagaluarpugut.
KNAPK-p siulittaasua, Leif Fontain aamma pisortasimasoq, Alfred Jakobsen tamassumunnga oqaaseqarusunngimmata, sinerissami immikkoortortaqarfiit paasitinneqarsimanersut paasiniaavigaagut.
Ilulissani KNAPK-p immikkoortortaqarfianut paasiniaanitsinni, Anton Lindenhann, taanna Ilulissani siulittaasup tullia oqarpoq, Alfred Jakobsen soraarsitaammat KNAPK-p siulittaasua sianertoq oqarlunilu "Pilluarit - piumasat pivat - Alfred soraarsitaavoq".
Anton Lindenhannip oqaloqatiginerani paasinarsivoq, taassuma Alfred Jakobsenip pisortatut KNAPK-mut sullissinera naammaginartutut isigisimanngikkaa, oqarluni KNAPK-mut qimulluarnermit Alfred taarserneqartariaqaraluartoq, taamalu isummersortarnini siulittaasumut oqaatigijuartarsimallugu Radioaviisimut oqaatigalugu.
Anton Lindenhannimit oqaloqatiginninnerput ilaatigut ima nipeqarpoq:
- Alfred Jakobsen suliunnaarsinneqarmat, tassa Leif Fontain ilinnut sianerluni oqarpoq, Alfred maanna suiliunnaartinneqartoq?
- Tassa Leif Fontainelu oqaloqatigiilluta taanna taama oqarpoq. Aammalu oqaatigalugu allamik pisortartaartariaqartugut. Uangalu qangali oqaatigisarpara allamik pisortaq taarserneqartariaqartoq KNAPK-mut qimulluarnermik.
Ilulissani KNAPK-p immikkortortaqarfiani siulittaasup tullia, Anton Lindenhann taama oqarpoq.
KNAPK-p siulittaasuata KNR-imut allakkamini erseqqissaatigaa, pisortamik atorfinitsitsinerit soraarsitsinerillu immikkoortortaqarfinnit susassaqarfigineqanngimmata.
Immikkoortortaqarfiit allat paasiniaavigigatsigit, ilaasa oqaatigaat pisortap suliunnaarsinneqarneranik paasitinneqarsimanatik, aatsaallu ullumi nutaarsiassani tamanna paasisimallugu oqarlutik, taakku ilagaat Upernavimmi siulittaasoq, Nikolaj Tobiassen, taannalu ima oqarpoq:
- Tassami pissusissamisuussagaluarpoq immikkoortortaqarfiit pisumik paasitinneqarsimasuugaluarpata. Leif Fontainellu issuarneqarnerani akueriuminnaatsortaqalaarpoq immikkoortortaqarfiit paasitinneqarsimanngimmata, Nikolaj Tobiassen oqarpoq.
Leif Fontainep KNR-imut allakkamini ilaatigut oqaatigigaluarpaa, immikkoortortaqarfiit tamarmik nalunaarfigineqarsimasut pisortap suliunnaarneranik.
Pisortap suliunnaarnernut imaluunniit soraarsitaasimaneragaaneranut pissutsit sorpiaat tunuliaqutaanersut, Nikolaj Tobiassenip oqaatigisinnaannginnerapaa, taamaattorli maluginiarsimallugu Alfred Jakobsenip tusagassiutinut saqqummertarnermini Naalakkersuisut isumaannut qanippallaartarnera, Nikolaj Tobiassen tamanna pillugu ima oqarpoq:
- Piniariaatsinut tunngasuni oqallinnermi Inuit Ataqatigiinnut isumaata qanippallaarnera paasinarpoq, tassalu Naalakkersuisut oqariartuutigisartagaannut qanittutut oqaatigineqarsinnaalluni.
Upernavimmi KNAPK-p immikkoortortaqarfiani siulittaasoq, Nikolaj Tobiassen taama oqarpoq.
Immikkoortortaqarfinni allani siulittaasut attavigisatta pisoq oqaaseqarfigerusunnagu KNR-imut oqaatigaat, soorluttaaq kattuffiup siulittaasuata, Leif Fontainep KNR-imut allakkamini tamanna oqaaseqarfigerusunnagu oqaatigigaa.
