Immiaaqqat aalakoornartortaqanngitsut nioqqutaalersinnaanissaannut isumaqataasut

Demokraatineersoq Justus Hansen imiaaqqat aalakoornartortaqanngitsut qillertuusanik puullit nunatsinnut eqqussinnaalernissaannik marsimi siunnersuuteqarpoq.

Siunnersuutilli inuussutissarsiornermut aatsitassanullu ataatsimiititaliamit piviusunngortinneqarsinnaanera isumaliusittiissummi takuneqarsinnaavoq.

AAMMA ATUARUK Immiaaqqat aalakoornartortaqanngitsut nioqqutaalernissaat taperserneqartoq

- Siunnersuut akuerineqassasoq ataatsimiiititaliap isumaqatigiittup inassutigaa, ataatsimiititaliaq Justus Hansenip siunnersuutaa pillugu taama allappoq.

Ataatsimiititaliaq partiinit Siumumit, Inuit Ataqatigiinnit, Atassummit, Suleqatigiisitsisut Demokraatinillu ilaasortaaffigineqartoq siunnersuummut akuersinissaa ilimanaateqarpoq.

Ernumanartoqanngilaq

Siunnersuut suliarineqarnerani ataatsimiititaliap immiaaqqanik aalakoornartortaqanngitsunik eqqussisinnaalernissaq tunngavilersuutigaa. Taamaammat inatsisinik sukaterisoqassappat kingunerlutitsisoqarnissaa ilimagineqanngilaq.

Ullumikkut imeruersaatit qillertuusanik puullit nioqqutissaareersut pinngortitamut ajoqutaanngitsut ataatsimiititaliaq isumaqarpoq.

- Imeruersaatit qiimmassaatitallit qillertuusat assigiinngitsut ullumikkut pisiassaapput,
tamanna aamma sumiiffinni poortuutissanut nalunaarutip atuuffiini, tamatumani ilaatigut
Redbull, Cult il.il. pineqarlutik, ataatsimiititaliaq itisiliivoq.

- Naak innuttaasut ullumikkut imeruersaatinik qillertuusanik puulinnik tamakkuninnga pissarsisinnaagaluartut puukut qillertuusat alumiiniut
illoqarfirnni takussaanerat assut killeqarsorinarpoq, ataatsimiititaliaq isummerpoq.
Siunnersuut maajip qulingiluaani aappassaaneerneqartussaq naalakkersuisunittaaq taperserneqarpoq.