"Immap unnuarianngui" Qeqertarsuup Tunuani erinarsortarput
Arfiviit Kalaallit Nunaata eqqaani nungutaaqqajarsimapput, Qeqertarsuulli eqqaanut ukiuni makkunani amerlasoorsuullutik uteqqissimallutik. Tamatumani miluumasut taakkua, ilisimatusarnermut pisortamit, Regner Møberg Christenseimit, immikkut atequseqartinneqalersimasut, malittarinissaat ilisimatuut periarfissaqartilerpaat.
Ilisimatusarnermut pisortap afivik immap unnuariannguatut taavaa, tassami taassuma arferit allat issuarsinnaammagit. Soorlu namminneq nipiliuutigalutik qilalukkatut qaqortatut nipiliorsinnaapput. Ataatsikkut marlunnik nipeqarsinnaapput, taamaalillutillu assigiinngitsunik marlunnik ersersitsiniarsinnaallutik.
Immap iluani mikrofonit, immallu iluani suaartaatit immamiitittuarnerisigut arferit nipiliorsinnaanerat ilisimatuut paasivaat, taavalu aalajangiussinnaallugu arfeq ataaseq taannaasoq marlunnik assigiinngitsunik nipiliortoq. Pinngortitat arlaqanngitsuinnaat taamaaliorsinnaapput, soorlu pillertat, miluumasorujussuilli, soorlu arfiviit, taamaaliorsinnaanerat tupigeqaarput, Regner Møberg Christensen oqarpoq.
Arfeq angutiviaq qularnanngivissumik arnavissat aggersarniarlugit nipiliortarpoq. Tamatuma kingorna nuliartarput, angutivissallu qimaguteqqittarlutik, arnavissalli Qeqertarsuup eqqaaniiginnartarput, puallarserlutik, kingornalu Davis Strædip akianukartarlutik piaqqiartorlutik.
Arfiviup nipiliornermigut pissusilersorneri arferit akornanni ajornakusoornerpaapput. Erinarsortutut iliortarput, aammattaarli imminnut oqaloqatigiittutut ittarlutik. Oqaluttuarineqartarpoq arferit 1000 kilometerinik ungasitsigalutik ilaminnik aggersaasinnaasut.
Oqassagaannilu erinarsuutit atortagaat ukiut tamaasa nikerartarput. Soorlu inuit pisartut erinarsuummik tamanit nuannarilluakkamik, aasaaneraniluunniit nuannarineqarnerpaamik takkuttoqaraangat. 2007-imi ataaseq atorpaa, 2008-mi nutaaq 2009-milu pingajuat. Imaannguatsiarpoq arferup ataatsip erinarsuutitut taasinnaasarput nutaaq ukiut tamaasa atortaraa, soorlu tassa immaqa pop-imik nuannarisat ukiut tamaasa erinarsuummik nuannarineqarnerpaamik nutaamik saqqummiussisartut, ilisimatusarnermut pisortaq, Refer Møberg Christensen naggasiivoq.
