Immap naasui illeqqallu qitiussapput
Taakku tamaani suleqatigissavaat Nunatsinni silap pissusaanik qitiusumik misissuivimmi Nuummiittumi sulisut, Københavnip Århusillu Universitetiineersut aamma Amerikami University of Rhode Islandimeersut.
Issittumi tamaani misissuinerup ilaatigut siunertaraa, naasut tappiorannartut upernaakkut naajoralertarnerat, tamakkumi upernaat tamaasa sikuerukkaangat, seqernup qinngornerisa imaq angusaleraangassuk, naajoralersarmata.
Qeqertarsuup Tunua ukiup sikuata kujammut killeqarfiata qanittuaniimmat, tamanna silap pissusaanik, sikumut tunngasunik aamma nerisareqatigiinnerup tunngaviini allanngoriartornernut misissuiffigissallugu piukkunnarluinnartuuvoq.
- Assersuutigalugu maluginiarneqarsinnaavoq, issittup illerai (kingunnit minnerit) puallaariit, illeraqatiminnit kujasinnerusuneersunit salunnerusunit, angeqatigisaminnit, issittup illeraanit orsukinneroqisunit inangerneqariartortut. Tamatuma kingunerisinnaavaa, aalisakkat timmissallu ilarpassui, nerisassatut pisariaqartitatik piniarlugit illeqqanik nerisassarsiornerminnut piffissaq annerusoq atortalissagaat, ilisimatooq Torkel Gissel Nielsen oqarpoq.
Ilisimatusaqatigiit Naasorsiooqarfimmi containerimi immikkut atortulersukkami sulissapput, tamaani nakkutigineqartumik kiassutsini assigiinngitsuni assigiinngitsunillu inuussutissalinni misileraassagamik.
