Immap kissarnerulernera niisat iluaraat

Silap pissusaata allanngoriartornera ima ajortiginngilaq, kikkunnulluunniit ajoqutaasinnaalluni. Tassami Nunatta Kitaani niisat immani kissarnerusuniinnissartik iluareqaat. Miluumasup imarmiup immap kissarnerulerneranik iluaquteqarnera taamaalilluni siullerpaamik uppernarsineqartoq, Pinngortitaleriffimmit nalunaarutigineqarpoq.
Allattoq Carla Davidsen
oktobarip 26-at 2011 07:42

Kitaani immap 1980-ikkunniilli kissakkiartuaaginnarnera ilutigalugu, niisat Nunatta imartaaniittarnerat sivitsorsimavoq, niisammi qaammatini marlussuinnarni sikumit akornusersorneqartalermata. Aamma saarulleqarnerulersimavoq, tamakkulu niisanit nerisarineqarluarput.

Kitaani niisanut tunngasut marloriarluni, ukiunik 14-inik akunneqartumik, misissorneqartarput; siullermik 1995-imi, kingornalu 2009-mi.

Arnavissat 1995-imut naleqqiullugit 2009-mi utoqqaanerusut, misissuinertigut ilaatigut paasineqarpoq niisallu 2009-mi 1995-imi misissukkanit malunnartumik oqimaannerullutik. Orsoqarnerunerat nerisaasalu 2009-mi allaanerulluinnarnerat, tamatumunnga pissutaavoq. Aalisakkat assigiinngitsut aqqanillit 1995-imi nerisarisimagaat paasineqarpoq, aalisakkat 2009-mi nerisarisarsimasaat assigiinngitsut 23-ullutik, taakkunannga saarulliit pingaaruteqarnerpaallutik.

Ataatsimut isigalugu immap kissarnerulernera aalisakkanut assigiinngitsunut periarfissarissaarnerulersitsimmat, tamanna niisanit nutaanik nerisassaqalernikkut iluaqutigineqalerpoq, taamaattumillu siornatigornit pualanerulersut, Pinngortitaleriffimmit nalunaarutigineqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq