Immap assingi navianarpallaaqaat

Nunatsinni immap assingi kukkuneqarput atoraannilu navianarlutik. Taamaammat nunat immallu assinginik aqutsisoqarfik maanna iliuuseqarnialerpoq.

Danmarkimi avatangiisinut ministereqarfiup atuagassiaani, Miljø Danmarkimi, saqqummersumi kingullermi atuarneqarsinnaavoq, immap assingi navianartut aqutsisoqarfiup aaqqiiffiginialersaarai. Immap assingini naleqqersuutit qaammataasakkut sumiissusersiutinut naleqqutinngillat.

Immakkut angallannermik nakkutilliisoqarfiup angallattaata uuttortaasartup Arsuup kangerluani qanittukkut ikkarlinnera immap assingisa kukkuneqarnerinik naqissuseeqqiinnarpoq.

Kitaata sineriaani 80 kilometerisut isorartutigisumi nunat immallu assinginik aqutsisoqarfimmi sulisut uuttortaapput, uuttortaasoqareerpallu pitsaanerusunik assiliornissaq neriuutigineqarpoq.

Timmisartukkut 1980-kkunni assilisat, immap assingisa 100-t missaanniittut naleqqersuutaasa aaqqissorneqarnerinut iluaqutaasinnaapput, taamalu immakkut angallanerit amerliartuinnartut isumannaallisarneqarsinnaalissasut, Miljø Danmark-imi tusagassiortoq allappoq.

Nunatta sineriaani uuttortaasut nunap immallu assilioriaatsimik nutaamik ujarlernertik ukiaru naammassissangavaat.