Immanuelsen: Qalerallit milliartorneri aarlerinarput
Qeqertarsuup tunuani umiatsiaararsorlutik aalisartut qaleralittassiissutit tamakkingajallugit ungasinngitsukkut aalisarsimalerpaat. Taamaattumik Naalakkersuisut qaleralittassiissutit 10.580 tonsinngorlugit – Pinngortitaleriffimmeersut qaleralittassiissutigineqartussatut innersuussutaasa annertussusaat marloriaatinngortillugit – annertusivaat.
Tamanna Inuit Ataqatigiinni politikkikkut siulittaasup tulliata Inatsisartunilu ilaasortaasup Aqqaluaq B. Egedep aalisarnermut naalakkersuisumut isornartorsiulluni arlalinnik apeqquteqarneranik malitseqarpoq.
Egedep ilaatigut paaserusuppaa, Naalakkersuisut siusinnerusukkut nalunaarutertik uumassusilerituut qaleralittassiissutigineqartussatut innersuussutaannik ukiuni tulliuttuni malittarinninnissartik qulakkeerumallugu qaleralittassiissutit annikillineqarnissaannut tunngasoq qatangiinnartissimaneritsik.
Immanuelsen: Nalilersueqqittariaqarsimavugut
Aalisarnermut naalakkersuisup Jens Immanuelsenip akissutimini Naalakkersuisut Qeqertarsuup tunuani Upernavimmilu qaleralittassiissutit annikilliartortinneqarnissaannut aalajangersimanerat ilumoortuunerarpaa, taamaattorli:
- Ukiormannali pisut aallaavigalugit nalilersueqqittariaqarsimallutalu iliuuseqartariaqarsimavugut, Jens Immanuelsen allappoq.
AAMMA ATUARUK Uumassusileritooq qaleralittassiissutit annertusineqarnerannut: Piniinnarsinnaanngilasi
Aqqaluaq B. Egedep aamma apeqqutigaa, Naalakkersuisut Pinngortitaleriuffup ukiuni kingullerni arlaliusuni qaleralittarineqartartut milliartornerannik erseqqissaateqartarnera ilutigalugu annikinnerusunik qaleralittassiissuteqartalernissaminnut pilersaarnersut:
- Ukiuni kingullerni qaleralittarineqartartut milliartorput. Tamanna aarlerinarpoq, tamannalu ilungersunartutut Naalakkersuisunit soorunami isigineqarpoq, aalisarnermut naalakkersuisoq Jen Immanuelsen akissutimini taama allappoq.
Suliassaqartuarsinnarnissaa eqqarsaatigalugu qaleralittassiissutit annertusineqartut
Immanuelsenip aamma ilisimatitsissutigaa, sumiiffimmi pineqartumi suliassaqartuarsinnarnissaa eqqarsaatigalugu qaleralittassiissutit annertusineqartut. Pinngortitaleriffiullu qaleralittassiissutigineqartussatut innersuussutaat tutsuignarluinnartutut Naalakkersuisunit nalilerneqartut aamma erseqqissaatigaa.
Uumassusilerituup Rasmus Nygaardip KNR-imut qanittukkut oqaatigaa, Qeqertarsuup tunuani qaleralinnik 2018-imi misissuineranni inernerusut takutikkaat aatsaat taama mikitigisunik qaleralittoqartalersimasoq. Qalerallillu suli alleqqajanngitsut aalisarneqartartut.
Naalakkersuisulli uumassusilerituut innersuussutaannik pimoorussigaluarlutik aalisartut aningaasaqarniarnikkut atugaasa patajaatsuunissaat pingaartinneruaat:
- Naalakkersuisut aalisartut aningaasaqarniarnikkut inissisimanerannik nalilersuinerminni aalajangerput Qeqertarsuup tunuani qaleralittassiissutit annertusineqarnissaat pisariaqartoq, Jens Immanuelsen allappoq.
