Immami qaartitsisarluni misissuinerit qilalukkat ikilisissinnaavai
Soorlulu ippassaq Radioavisimi oqaluttuarigipput, sooq Amerikamiut suliffeqarfiutaat GXT Tunup avannaani sumiiffinni illersukkani immap iluani qaartitsisarluni misissuiniarnersoq, ICC-p paasiuminaatsippaa.
ICC-mi isumaqarpoq, taamaaliornissaq tamaani arfernut kinguneqarujussuarsinnaasoq:
- Arferit soqqallit ileqqutik allanngortittarpat, soorlu umiarsuit ningortertarlugit, allamut ingerlallutik immaqalu neriniarunnaarlutik. Aamma akuttunerusumik takuneqartarsimapput, piaqqatik qimattooraat, nipiliornermillu attaveqarfigisinnaanagit. Ajornerpaassappammi tusaaniarnerat ajoqusersinnaavaat, allaalluunniit toqullugit. Kisianni periuseqartaraluarput, nipiliortoqaleraangat, arferit kalerrittarlugit, avatangiisit pillugit ICC-mi siunnersorti, Parnuna Egede, oqarpoq.
Namminersorlutik Oqartussat Tunup avannaata avataani uuliamik ujarlernissamut akuersissutinik ukiuni tulliuttuni tunniussinissani naatsorsuutigaa. Kisianni GXT-p Tunup avannaani nunami allanngutsaaliukkap avataani imartani immap iluani qaartitsisarluni misissuisinnissaa, Parnuna Egedep mianersoqqussutigaa.
Tassami paasinarsisimavoq, arferit soqqallit saniatigut arferit kigutillit aamma qaartitsisarluni misissuinernit sunnerneqartartut.
Piviusoq taanna misissuinerni taamaattuni eqqarsaatigivallaarneqarneq ajorpoq:
- Qilalukkanukua qernertat sumiiffigisaminnut atasupilussuit. Nuliarnerminni, piaqqinerminni neriniarnerminnilu sumiiffinni aallajangersimasuniittarput. Taamaammat qilalukkat qernertat qaartitsinikkut nipiliornernut malussarissuupput. Neriniarfigisartakkaminniit piaqqiorfimminniilluunniit qimaatinneqarunik naggataatigut ikilisinnaapput, Parnuna Egede, oqarpoq.
Amerikamiut suliffeqarfiutaat GXT Nunatta imartaani qaartitsisarluni 2009-mi 2010-milu qaartitsisarluni misissuisarpoq, akuerineqassagunilu aasaq manna taamaalioqqissalluni.
Avatangiisinut sunniutaasinnaasut pillugit namminneq naliliinerminni allapput, taamaaliorneq qilalukkanut qernertanut, arfivinnut aavernullu sunniuteqarsinnaasoq, kisianni namminneq allannerattut sunniutit annikitsuussasut.
GXT-p aamma nassuerutigaa, aataat ussuillu qanoq qisuariartarnerat pillugu ilisimasat annikeqisut, umiarsuarli misissuut qaartiterisoq qanillivallaarunikku tutsarissusiat ajoquserneqarsinnaasoq.
Aamma nannut qanoq sunnerneqartarnersut ilisimaneqanngilaq, kisianni GXT-p nalunaarusiaani eqqarsariartaaseq malunnarpoq, taakkua amerlanngitsuusut aammalu immamiippiarneq ajoramik, umiarsuup qaartiterineranit taakkununnga sunniutit annikitsuarassagunartut.
