Immami isumannaatsuunissamut malittarisassat sukaterneqalerput
Nunatsinni politikerit kissaatigaat, immami angalasasut tamarmik - angallataasa angissusaat inuttaasullu ilinniarsimassusiat apeqqutaatinnagu - aavisa aallakoornartumik akoqarsinnaassusiat killilerneqassasoq, aqqusinikkut angallannermi inatsit assigalugu.
Kisianni nunatta imartaani angalasut aalakoornartulittunnginnissaannut malittarisassat immikkuullarissutigaat, nunatsinni politikerit kissaatigimmassuk, ilaasut aamma aallakoornartulittugaasa killilerneqarnissaat. Danmarkimi taama sukannertiginissaq danskit politikeriisa ingasagaat.
Kisianni sulianik ilisimasallit pisortallu tunngavilersuutigaat, Nunatta silaata allanngorarnerujussuata, sikoqartarnerata sinerissallu isorartornersuata immakkut angalaniarneq uloriarnerutimmagu sukannernerusumik maleruagassaqartariaqartoq. Nunatta imartaani angalaniarneq Danmarkimi atukkanit allaanerujussuusoq oqaatigineqarpoq.
Tatumatuma kingunerisaanik Namminersorlutik Oqartussat immikkuullarissunik nunatsinni malittarisassiorsinnaanissaat inatsimmi nutaami periarfissaalissaaq. Angallatinillu - sukisaarsaarutaagaluarpataluunniit - ingerlatsisut aalakoornartulimmik imernissaannut killiliinissaaq ilimanarluinnarpoq.
Aalakoornartoqassutsimut malittarisassat aamma ilaasunut atuutissapput. Kisianni Namminersorlutik Oqartussat isumasiorneqareerpata, umiarsuarsuit takornariartaatit umiarsuillu aqqaneq marluunik amerlanerusunik ilaasoqarnissamut akuerisat malittarissassanit ilaatinneqanginnissaat isumaliutigineqartoq, inatsisissatumut nassuiaatini allassimavoq.
Umiarsuarsuarnik takornariartaatinik tikittoqartuassappat, ilaasullu 1000-it immaqaluunniit allaat 2000-it balloninik pullaatillugit misissortarnianngikkaanni, takornariartaassuit inerteqqummut ilaatinnginnissaat isumatusaarnerussagunarpoq.
Immakkut angallannermi isumannaallisarneq pillugu inatsisissatut siunnersuut Folketingimi siullermeerlugu suliarineqareerpoq, aasakkullu sulinngiffiulersinnagu naammasineqarnissa naatsorsuutigineqarpoq. Taava Nunatta Inatsisartuisa ukiaru suliarereerpassuk, oqartarnerattut kunngip atortussaalersitsineratigut, Nunatsinni atuutilersinnaassaaq.
