Imigassartorsimatilluni imaani angalasoqarunnaassaaq - aamma ilaasuni

Imarsiornerup isumannaatsuunissaa pillugu inatsisit allannguutaasa, Kalaallit Nunaannut atuutilersinnerinut peqqussut, Inatsisartuni ippassaq oqallisigineqarpoq. Allannguutaasinnaasutut siunnersuutit ilagaat, angallatit qanorluunniit angitigigaluartut atorlugit angalanermi, imigassartorsimatilluni promilli aalajangersimasoq qaangerneqassanngitsoq.

Allatut oqaatigalugu: Angalammi aquttuuguit ilaasuinnaaguilluunniit, imigassartorsimallutit aavit imigassaq 0,5 promille akugippagu, taava inatsimmik unioqqutitsisimassaatit.

Taama inatsimmik atuutsitsilernissaq, Angallannermut Naalakkersuisup, Jens B. Frederiksenip nuannaarutigaa.

- Assersuutigalugu, biilimi ingerlatitsisup akisussaaffik annertooq tigummisarpaa, taamaattumik tassunga annertunerusumik ulorianaateqanngilaq, biilimi ilaasoqassalluni aalakoortunik. Angallammili allaaneruvoq, tassami silarlutillugu pisariaqarpoq ilaasut aamma qaatusimanissaat.

Jens B. Fredriksenilu tassa isumaqarpoq immakkut angallanneq nunami biilernermit ulorianarnerusoq - taassuma ilanngullugu oqaatigaa, biilimi ilaasut imigassartorsimagaluartut biilimi aquttoq imigassartorsimanngippat aqqutissaqanngitsoq.

Jens B. Fredriksen tamassumunnga tunngavilersuutigaa, silap allanngoriasaartarnera immakkut angalanermi iluamik nakkutigineqanngippat tamanna kingunerlussinnaammat, taamaattumillu umiatsiami issimasut tamarmik qaatusimasariaqartut ajunaartoqannginnissaa piniarlugu.

Inatsisartuni illuatungiliuttut, Siumukkut angallanneq pillugu oqaaseqartartuata, Kim Kielsenip oqaatigaa, inatsimmik taamaattumik atuutsitsisoqalissagaluarpat tamanna ingasappallaatsiartoq.

- Inatsit qanoq sukaterneqassanersoq annertuumik Inatsisartuni oqallisigineqartariaqarpoq. Sippulimmik ingattarserlunilu sukaterisoqassanngilaq, Kim Kielsen oqarpoq.

Inatsimmik sukaterinissamut taarsiullugu nunatsinni innuttaasut ataasiakkaat akisussaanermik pigisaqartariaqartut, Kim Kielsen erseqqissaavoq.

- Kialluunniit umiatsiaaqqamik ingerlatsiguni taassuma inuunini akisussaaffigisarpaa, taamaattumik inuk imminut oqarfigisariaqarpoq; Uanga imigassartornikuugama angalasariaqanngilanga. Aamma kammalaatitsinnut inunnullu allanut oqarsinnaasariaqarpugut, imigassartorsimasoqartillugu aallaqqusisassannginnerput. Nangartaaserpallu taava matuersaataanik arsaarneqarnissaa periarfissat ilagaat, tassa taama pissusilersortariaqarpugut, Kim Kielsen oqarpoq.

Inatsit atuutilissagaluarpat kikkut tamassuminnga nakkutilliissuussanersut, Angallanermut Naalakkersuisoq, Jens B. Frederiksen aperaarput, taannalu akivoq.

- Nunatta inatsisaanik unioqqutitsisoqartillugu suliarinnittut tassaasarput politiit. Taamaattumik naatsorsuutigineqartariaqarpoq tamanna politiinik suliarineqartassasoq, qanorpiarli politiit tamassumunnga suleriaaseqassanersut unanga oqaaseqarfigisinnaanngilara.

Angallannermut Naalakkersuisoq, Jens B. Frederiksen taama oqarpoq. Taassuma naqissuserpaa, qallunaat Suliffissuaqarnermut Aningaasarsiornermullu ministeriat, inatsimmik taamaattumik atuutsitsilersinnaanissamut piginnaatitaammat, Nunatsinnullu inatsit atuutsinneqalissappat, nunarput paasiniaaffigineqaqqaassasoq.

Immakkut angallannermi inatsisissatut siunnersuutip aappassaaneerneqannginnerani tamanna ataatsimiititaliap oqaluusereqqaassagaa siunniunneqarpoq.