Imigassap ammanerusalernissaa assigiinngitsumik isummersorfigaat

Neriniartarfiup Godthåb Bryghusip piginnittuata Jørgen Pedersenip siunnersuut paasiuminaatsippaa ammaassineruallaartutut isigalugu.

- Malik Berthelsenip siunnersuutaa pillugu talikka qullarsimanngilakka. Takusinnaasara malillugu pitsaanngitsup tungaanut nikeriartoqalerpoq, Jørgen Pedersen oqarpoq, oqaatigisinnaannginnerarpaali siunersuut neriniartarfiutilinnut sunniuteqassanersoq.

Kalaallit Nunaanni imigassamik atuinerup Danmarkimi atuinermiit appasinninngorfiani Jørgen Pedersenip eqqumiiginartippaa pisiniarfinni imigassanik pisiniarsinnaanerup sivitsorniarneqarnera. Taassuma siunnersuut iluareqqusaarutitut taarusunneruaa.

- Siunnersuut saqqummiunneqarpoq naak tamanna pisariaqavinngikikaluartoq. Imaassinnaavoq siunnersuut saqqummiunneqartoq siunnersuuteqartoq partiialu kalaallit akornanni iluarineqalersinniarlugit. Uagut susassaqarfitsinni imigassat tunineqartartut 5 procentii taamaallaat tunisarpagut, aamma qularutiginngilara inuit imerniartarfiliartartut inussioriartorlutik, Jørgen Pedersen oqarpoq.

Nuummi Brugsenip naatsorsuutiginngilaa immiaaqqat, viinnit imigassallu tunisaanerulernissaat, taamaattoq iluarisimaarpaat imigassat matulivinneranni pisiniuttorpassuaqartarnerata qaangerneqarnissaa.

- Pisisartugut eqqarsaatigalugit siunnersuut pitsaasuuvoq taamaasillutik pisiniarfiliarnissamut piffissaqarnerulissagamik. Pisisartummi inuunertik nammineq akisussaaffigaat taamaattoq ilimaginngilara tunisatta amerlinissaat. Kisianni pisiniarfiit matoreerneranni biilit nassataasivianniit immiaaqqanik tunisaqartarneq killilerneqartussaammat tamanna pitsaasutut isigaara, Brugsenimi immikkoortumi pisortaq Jes Nyborg oqarpoq. Aamma ilanngullugu oqaatigaa imigassat ammanerusalerpata pisiniarfiup ammasarfiisa allanngornissaat ilimananngitsoq.

Akunnittarfiit neriniartarfiillu peqatigiiffiat HORESTA Malik Berthelsenip siunnersuutaanut oqaaseqarusunngilaq.