Imigassaarniarneq saqquminnginnerusariaqarpoq
Sverige-mi periusaat systembolagetimik taasarpaat, amerikami liquore stores, Islandimi vínbúð savalimmiunilu Rúsdrekkasøla Landsins ulluinnarni rúsenimik taaneqartartoq. Tassa nunat sanilitta imigassap saqqumivallaanngitsumik nioqqutaanissaanut iliuusaat.
Nunatsinnissaaq imigassap nioqqutaanera saqqumivallaarunnaartariaqartoq IAp politikkikkut oqaaseqartartua Juliane Henningsen isumaqarpoq.
Immiaaqqat imigassallu niuertarfinni tuniniarneqartarneranni niuertarfiit matunginneranni nukingertarnerit ulapittarnerillu oqallisigineqarnissaat Inuit Juliane Henningsen-imit siunniunneqarpoq.
Niuertarfinni imigassanik immiaaqqanillu tuniniaanerup matulernerannit inersimasut ulapittarneranni ingammik meeqqat pisiniallu allat eqqorneqassanngitsut Juliane Henningsen isumaqarpoq. Taamaattumik imigassanik immiaaqqanillu tuniniaasarnerup allanngortinneqartinneqarnissaa IA-mit isumaliutigineqarpoq.
- Imigassat niuertarfinni tuniniarneqartarneranni ersiinnartumiittarnerat allanngortinneqarsinnaanera isumaliutigineqarpoq, maleruagassat allanngortinneqarnerisigut, Juliane Henningsen aviisimi Sermitsiami apersorneqarluni taamatut oqarpoq.
Inatsisartup upernaakkut ataatsimiinnissaanni martsip ulluisa aallaqqaatani aallartissami, oqallisigineqarnissaa siunnersuutigaa, tamatumalu kingorna erseqqinnerusumik siunnersuutigineqarnissaa kissaatigalugu.
- Aalajangersimasumik siunnersuuteqanngilagut, kisiannili nunani allani imigassanik tuniniaaviit nalinginnaasuni niuertarfinni tuniniarneqarneq ajortut eqqarsaatigineqarput, tassalu niuertarfiit imigassaannarnik tuniniaaviusut eqqarsaatigineqarput, taama Juliane Henningsen oqarpoq.
