Imerniartarfiutilik: Inuit akiuussuserneqarsimanersut aperisalissavagut
Neriniartarfinni assigisaanilu inuit amerlanerpaamik 20-usinnaanerat arfininngorninngormat atorunnaarput.
Tassalu politiit qinnuigippassuk, tamakkiisumik akiuussuserneqarsimanermut uppernarsaammik takutitsisoqartariaqalerpoq.
Aamma coronavirussimik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik takutitsisoqarsinnaavoq.
Malittarisassatoqqat ukunani suli atuupput:
- Tuniluuffiusuni Aasianni, Upernavimmi Upernaviullu pigisaani nunaqarfinni malittarisassat suli atuupput
- Assersuutigalugu neriniartarfinni inuit amerlanerpaamik suli 20-usinnaapput.
- Aamma tamat ornigarfigisinnaasaanni qanermut assiaquteqartoqassaaq
Tusarfik: Naalakkersuisut
Tamannalu isumassarsiatsialaasoq, Nuummi imerniartarfinnik Auromimik Daddysimillu taavalu neriniartarfimmik Killummik ingerlatsisoq, Laarseeraq Chemnitz Egede, isumaqarpoq.
Misissuiviilli ilungersorfiorujussuannginnissaat taassuma neriuutigaa:
- Ataavartumik misissortittarniartut qanoq ingerlanissaat pissanganarpoq. Misissorteqattaartoqarsinnaanersoq akissutissarsisoqaqattaartoqarsinnaanersoq, aamma sapaatit akunnerisa naanerini, pissanganarpoq.
- Kisianni atuutilernera isumalluarnartuusoraara, Laarseeraq Chemnitz Egede oqarpoq.
Ersiutillit imerniartarfinnukarusuttunit salliunneqassasut
Misissuisoqassagaangallu imerniartarfiliarusuttut salliunneqartassanngillat.
Nunatta avataanit tikittut, coronavirusimik tunillatsissimasutut ersiutillit tunillatsissimasunulluunniit qanillisimasut salliunneqartassapput.
Oqartussat ullumi arfininngornermi nalunaaruteqarput.
Politiit neriniartarfinni imerniartarfinnilu misissuillutik nakkutiginnittussaapput.
Aamma assersuutigalugu neriniartarfinnik piginnittut namminneerlutik nakkutiginnissinnaapput. Tamannali politiiniit piumasaqaataanngilaq.
Larseeraq Chemnitz Egedeli imerniartarfiutimik silataani aperisoqartarnissaanik aalajangersimavoq.
AAMMA ATUARUK Politiit akiuussutissamik kapitissimanersutit paasiniarlugu unnuap-qeqqanit misilittaaffigissavaatsit
Kikkut tamakkiisumik akiuussuserneqarsimasariaqanngillat tunillatsissimannginnermullu uppernarsaateqartariaqarnatik?
- Assersuutigalugu pisiniarfinni allaniluunniit tamakkiisumik akiuussuserneqarsimanermut uppernarsaateqarfiusussani suliguit tamakkiisumik akiuussuserneqarsimanermut uppernarsaateqarnissaq suliartornissannut piumasaqaataanngilaq.
- Aammattaaq inuit Covid-19-imut akiuussutissamik kapitinnissamut innersuunneqanngitsut meeqqallu 17-inik ukiullit 17-illuunniit ataallugit ukioqartut ”coronapas”-imik takutitsisariaqarnermut ilaatinneqanngillat.
Tusarfik: Naalakkersuisut
Iserniartulli uppernarsaammik takutitsisinissaat aallaqqaataani piumasaqaataanavianngilaq.
- Matumi aperisarniarpugut, sapaatillu akunnerata naanerani siullermi angerunik isertittarniarpagut. Taava politiit uppernarsaammik takunnikkiartorniarpata, politiinik oqaloqateqartariaqassapput, Laarseeraq Chemnitz Egede oqarpoq.
Auromimi Daddysimilu sulisut akiuussuserneqarsimanermik uppernarsaammik imerniartarfinnukartunit takunninnissartik siunissami piumasarisalissavaat.
- Matuni siunissami misissuisalerniarpugut. Aggertut najuunnerminni pitsaanerpaamik misigisaqarnissaat qulakkeerusuppara, tamannalu matuni misissuisarnikkut qulakkeerneqarsinnaassasoraara, Laarseeraq Chemnitz Egede oqarpoq.
Akiuussuserneqarsimanerit ima takutissinnaavat
Tamakkiisumik akiuussuserneqareeruit paasissutissap taassuma danskit coronapassiannut ilanngunneqarnissaa sullissivik.gl-ikkut qinnutigisinnaavat.
Coronapassi Appstorekkut Playbutikkikkulluunniit aasinnaavat.
Qarasaasianik atuivallaartanngikkuit akiuussutisserneqarsimanermut paasissutissat e-boksinnut pdf-inngorlugit nassiunneqarnissaat piumasinnaavat. Taanna anillatseriarlugu kaasarfimmiorsinnaavat.
Aamma allamik ajornanngitsunnguamik periarfissaqarpoq: Akiuussuserneqarlerninni pappiaraq atinnik kapitinnernullu piffissamik allagartaqartoq aamma tigummiinnarsinnaavat.
Imerniartarfimmiikkuit uppernarsaallu qimassimagukku aamma tamanna maanna ajoqutaanavianngilaq.
Taamaattoqarpat politiit illit pillutit peqqinnissaqarfimmut saaffiginnissinnaapput. Politimesteri Bjørn Tegner Bay KNR-imut tallimanngormat taama oqarpoq.