Imermik misissuivik nuunneqarsinnaasoq atorsinnaalertoq

Nukissiorfiit imermik misissugassamik Uummannap imeqarfiani angerlarsimaffinnilu assigiinngitsuni ullut tamaasa qalusisarput, erngullu uuliamik akoqarnera misissortarlugu.
Nukissiorfimmi sulisut ilaata septemberip ulluisa aqqarnganni kukkulluni imeq klorimik akusussaallugu uuliamik akusimavaa. Tamannalu sisamanngornermi septemberip ulluisa 19-anni aatsaat paasineqarpoq, taamaalineranilu innutaasut pasitsapput imeq uuliasunnimmat. Assi © : KNR / Anton Gundersen Lihn
Allattoq Thomas Munk Veirum, Nina-Vivi Andersen
oktobarip 08-at 2019 06:51

Uummannami imermik misissuivik nuunneqarsinnaasoq atulersimasoq Nukissiorfiit ataasinngornermi nalunaarutigaat.

Taamaalilluni erngup mingutsinenqarsimasup misissornissaanut Nukissiorfiit pingaarutilimmik atortoqalerput, ingerlaavartumillu misissuisoqarsinnaanngorluni.

Nukissiorfiit taama nalunaaruteqarput.

AAMMA ATUARUK Uummannami imermik misissuivimmik pilersitsisoqassaaq

Imermik misissuisartut Danmarkimeersut marluk maanna Uummannamiipput, taakkulu imermik misissuisarfik aamma tikisinneqarsimasoq atorlugu misiliutinik ingerlaannaq takusaqarsinnaalerput.

Imermik misiliutit Danmarkimut nassiunneqarneranni ullut tallimat siullermik utaqqineqartaraluarput. Imermillu misissuiviup tikiunneqarnerata kingorna sukkanerusumik inernerit takuneqarsinnaalissasut Nukissiorfiit KNR-imut oqaatigaat.

AAMMA ATUARUK Aalisartut sillimmasiinermut akiliisarnerunissamut ernumasut

Imermik saliutit tarajuiaasinnaasut aamma Uummannamut tikiunneqarsimalerput, taakkulu imermik atuisinnaanermik nakkutilliisuniit akuerineqarnissaat maanna utaqqiinnarneqarpoq.

Imeq atorfissaqartinneqartoq tunitsivinnut tallimanngormamiilli tunniunneqartartoq Nukissiorfinniit aamma oqaatigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq