Nukissiorfiit Uummannami imermik misissuivimmik pilersitsisoqassaaq
Erngup ippassaq misissorneqartup inernerisa takutippaat erngup pitsaassusia ajornerulersimasoq. Nukissiorfiit iliuusissat nutaat tulliuttut kingorna iliuuseriniarpai, taamaaliornikkut sapinngisamik piaarnerpaamik erngup nalinginnaasumik pitsaassuseqalernissaa anguniarlugu, kiisalu innuttaasut aamma inuussutissarsiutinik ingerlatsisut imermik ajornartorsiuteqarnerannik ikiorserniarlugit:
Nukissiorfiit tusagassiuutinut taama nalunaaruteqarput.
Ilaatigut Uummannami imermik misissuiffimmik pilersitsisoqassaaq imermut tunngasumik immikkut ilisimasalinnik sulisulerlugu.
Tamatuma misissukkat inernerisa paasineqarnissaa pilertornerulersissavaa, tassami piffissap angallanneqartarfiisa sukkatsisinneqassammat.
AAMMA ATUARUK Nukissiorfiit pisortaanerat ingerlaannartumik pisortaajunnaartoq
Aammattaaq immamik tarajuiaanermik osmoseanlægimik taaneqartartumik aallartitsisoqassaaq.
Tamanna aalisakkeriviit inuussutissarsiornermillu ingerlataqartut imermik pisariaqartitsineranut ikiorsiissutaassaaq.
Oqartussaasunik attuumassuteqartunik aamma iliuuseqartussanik suleqateqarnikkut, assigiinngitsut aallartinneqarnissaat, innuttaasut ulluinnarni atugaannik oqilisaassiniarluni sulissutigineqarpoq, Nukissiorfiit allapput.
Sulisut nunap immikkoortuini Nukissiorfinni allaneersut sammisami misilittagaqartut Uummannamukartinneratigut tamanna pissaaq.
AAMMA ATUARUK Nukissiorfiit Uummannami imeq pillugu nalunaarutitik tunuartikkaat
Tamakku saniatigut ajornartoornermi pilersuiffiit qulingiluat suli imermik imerneqartussamik minguitsumik pilersorneqartuassapput, pisup imermut tunngasup patajaallinissaata tungaanut, Nukissiorfiit neriorsuipput.
Kiisalu nukissiorfiit Uummannami innuttaasunik oqaloqatiginnittarnertik pitsanngortinniarpaat. Nukissiorfiit sapaatip akunnerata siuliani innuttaasunik ataatsimiititsipput, innuttaasut imermik amigaateqarnermut tassani sapaatip akunneranik ajortumut atatillugu pakatsisimanertik oqartiartuutigaat.
Suliffeqarfiup pisoq ajusaarutigaa.
- Soorunami pisumut ajuusaarpugut. Aamma Inuit pakatsillutik naammagittaalliornerat paasilluarpagut, tassami naliginnaasumik imermik pilersorneqarunnaarnermikkut inuit ulluinnarni atugaat sunnerneqarujussuarpoq. Inuup kukkuneranik tamanna pivoq sapinngisarpullu tamaat iluarsiniarlugu iliuuseqarpugut. Tamannali naammassimarpasinngilaq.
Nukissiorfiit oqaloqatigiinnerup pitsaanerulersinnissaa, apeqqutigineqartunik akissuteqarnissaq aamma innuttaasunik suliffinnillu ingerlatsisunik iliuuserineqartuni angusarineqartut pillugit ilisimasaqarniassammata innuttaasunik sisamanngornermi oktobarip pingajuanni, ataatsimiititseqqissapput.
