Imarsiornermik Qullersaqarfik pinngitsuutitsivoq
Angutip aalisartup 31-nik ukiullip kilisaammit Erikamit avammut nakkarluni siorna februaarimi ajunaarneranut atatillugu upalungaarsimanissamut malittarisassat unioqqutinneqarsimanerarlugit, Imarsiornermik Qullersaqarfiup East Greenland Codfish politiinut tunniukkaluarpaa.
Kalaallit Nunaanni politiit allagaqaataanni Radioaviisip pissarsiarisimasaani tamanna atuarneqarsinnaavoq.
Pissutsinik atuuttunik paatsoortoqarsimasinnaaneranik ilimatsaassat pissutigalugit kilisaataatillit Imarsiornermik Qullersaqarfimmit pinngitsuutinneqarput.
31-nik ukiulik qalorsuit ujarattaannik oqimaaluttanik katersitilluni angallat uerujussuarmat qalorsuarnit eqqortilluni avammut nakkarpoq.
- Kilisaatip ungaluusaasa ilaat kilisaataatillip peersimavai, tamannalu ajunaarnermut pissutaavoq. Aalisartoq umiarsuup qaavanut nakkaannarsimasinnaagaluarpoq, ungaloqanngimmalli immamut nakkarsimalluni, Imarsiornermik Qullersaqarfimmi inatsisilerituut qullersaat, Finn Tikjøb, KNR-imut ukiormanna februaarimi nassuiaavoq, taamatulli nassuiaaneq maanna tunuartinneqarpoq.
Kilisaatimmi ungaluusaasa ilaannik peersisoqarsimanngilaq, ungaluusanilli allanngortiterisoqarsimalluni, Frank Bjerg Mortensen, Kalaallit Nunaanni Politimestereqarfimmi allaffimmi pisortaq allappoq.
Politiit taama aalajangernerat, East Greenland Codfiship ulluinnarni aqutsisuata, Einar Halssonip, oqiliallaatigaa, Radioaviisimulli annerusumik oqaaseqarusunnani.
