Imarsiornermik ilinniarnerit siuariartorfiusut
Ilinniartitaanermut Naalakkersuisoqarfiup tusagassiuutinut nalunaarutaani oqaatigineqarpoq, angallatit naalagassaattut ilinniartut aallarterlaat, maanna 20-usut, apriilimilu ilaqqissallutik. Tamatuma peqatigisaanik tunngaviusumik ilinniarfimmi ikerinnakkut taamaatiinnartartut malunnaatilimmik ikileriarput, aamma inuutissarsiummik ingerlatsisut Imarsiornermik Ilinniarfik suleqatigalugu pikkorissaanissamut annerujartuinnartumik periarfissaqalerput.
Taama ineriartortoqarnera Ilinniartitaanermut Naalakkersuisup, Nick Nielsenip, nuannaarutigaa, sumiiffinnilu ataasiakkaani inuutissarsiutinik ingerlatsisut suliaq tapersersortuassagaat ilimagalugu:
- Inuussutissarsiutigalugu imarsiornermik ingerlataqartut Imarsiornermik Ilinniarfiup siulersuisuini peqataatitaqarluarput. Inuussutissarsiummut taama qanimut attaveqarneq ilinniartut, ilinniakkat pikkorissartarnerillu amerliartorluarnerinut pingaaruteqartumik pissutaaqataavoq. Soorunami aamma uanga naalakkersuisutut ilimagivara, imarsiornermik inuussutissarsiuteqartut sulisussat kalaallit ilinniarluarsimasut aalaakkaasumillu sulisut ilinniareeraangata atorfinitsittarumaaraat, suliffissaaleqineq ilinniartitsineq aqqutigalugu annikillisarneqarsinnaaqqullugu, Nick Nielsen erseqqissaavoq.