Imak: Palle, kaammattorpakkit atuartitsinermik misiliissasutit

Palle Christiansenip meeqqat atuarfiannut tunngasumik oqaasii atuarfimmik paasisimasaqannginnermik tunngaveqartut Imak-imit oqaatigineqarpoq:

- Atuarfeqarneq pillugu naalakkersuisunngoraanni imaanngilaq atuarfimmi pissutsit tamaasa ilisimalerlugit,  Imak-ip siulittaasua Sivso Dorph oqarpoq imalu Palle Christiansenimut kaammattuuteqarluni:

- Palle Christiansen, kaammattorpakkit qaammammi ataatsimi atuarfimmi atuartitsinermik misiliissasutit, suna eqqartorneqarnersoq paasilluarniassagakku, Imakip siulittaasua oqarpoq.

Palle Christiansenimut kaammattuut akissutaavoq, tassami Ilinniartitaanermut Naalakkersuisunngoramili meeqqat atuarfiat pillugu oqaloqatigiinnerunissamik aamma atuarfeqarneq pillugu allannguinissanik kaammattuuteqartarpoq.

Palle Christiansenip uparuagaasa ilagaat, ilinniartitsisut ataatsimiippallaartartut, taamalu oqarnera ilinniartitsisut isumaqatiginngilaat.

Palle Christiansen ilaatigut  ippassaq ima oqarpoq:

- Atuarfiit meeqqat pillugit napammata ilinniartitsisut kattuffiat Imak meeqqat siunissaat pillugu ammasumik isumasioqataaqqullugu kaammattorpara.

Imak-ili matunik matoqqasunik naammattuuisaannarnerarpoq. Sivso Doph ima nassuiaavoq:

- Imak naalakkersuisunut Inatsisartunullu qasseriarluni saaffiginnissuteqartarsimagaluarnersoq misissoqqullugu, Naalakkersuisunut ilaasortaq Palle Christiansen Imak-ip sakkortunerpaamik kaammattorusuppaa. Ukiuni kingullerni saaffiginnissuterpassuavut akineqarnikuunngillat, Sivso Dorph naggasiivoq.